A Laax, gist sper la rundella da Laax-Uletsch, vegn construì dapi dus onns e mez il hotel d'appartaments Peaks Place Laax. Il cumplex da 120 meters lunghezza cumpiglia otg chasas da mintgamai tschintg auzadas. En tut dat i 102 novas abitaziuns da vacanzas, 74 abitaziuns administradas e 28 abitaziuns secundaras. Ils 20 da december avra il hotel en ina emprima fasa 42 abitaziuns. Sin la stagiun d’enviern 2016/17 avra lura igl entir cumplex.
Standard da 4 stailas
Il standard dal Peaks Place Laax san vegnir cumpareglià cun in hotel da 4 stailas. Radund 90 milliuns francs custa la surbajegiada. Investider è la HRS Real Estate SA. Sper in parcadi sutteran da duas auzadas per total 120 autos, èn era planisads in restaurant ed ina zona da wellness. La zona da wellness cun differentas saunas e bogns ha ina surfatscha da radund 850 m2, quai correspunda a bunamain in mez plaz da hockey.
Cumparegliaziun dals maletgs
Directur da la Germania
Il directur dal nov hotel d'appartaments Peaks Place Laax è Claudius Holinski da Bielefeld en Germania. L’um um da 35 onns ha gia lavurà dapli che 15 onns en la hotellaria. Entschet ha el sia carriera sco servient en in hotel a Londra.
Suenter ha el lavurà plirs onns en differentas funcziuns en hotels da quatter e tschintg stailas el conturn da Minca ed a Peking. Dapi il matg ès el directur el Peaks Place Laax. Sia finamira sco directur è da porscher in service individual. In hotel d'appartaments saja auter ch'in hotel normal. Ils giasts restian en media pli ditg ed uschia saja era plitost pussaivel da bajegiar si ina relaziun persunala cun ils giasts.
Di da las portas avertas
Ils tschintg da december ha il hotel organisà in di da las portas avertas. Tgi che vul ir a guardar il cumplex ni forsa dar in'egliada en ina da las abitaziuns d’exempel, sa far quai la sonda davent da las 10.00 enfin las 19.00.
