La fundaziun inplus è enconuschenta per organisar e manar atras curs da tut gener, cunzunt curs per emprender linguatgs. Quellas enconuschientschas professiunalas sajan in grond avantatg per planisar il nov post d’integraziun, manegia il gestiunari da inplus Conradin Klaiss.
Las finamiras impurtanta saja da gidar esters durant il contact cun las administraziuns communalas. Dentant era uffants da scola da l’ester che dovrian sustegn d’emprender linguatgs sco era creschids che na discurrian betg tudestg, possian profitar da la lavur dal post d’integraziun.
Subvenziunà dal chantun
Posts d’integraziun èn ina incumbensa da la partiziun d’integraziun da l’Uffizi per migraziun e dretg civil. Lez na dispona dentant betg da las resursas umanas per manar in tal post ella Surselva. Perquai planisescha l’uffizi da finanziar quai post durant ils emprims 3 enfin 5 onns, il manaschi sto dentant vegnir organisads da inplus.
Plazza da 40% enfin 60%
Tenor Conradin Klaiss saja quai ina plazza cun in pensum da 40% enfin 60%. Sco manadra da project è vegnida engaschada Madlen Deflorin-Spescha da Mustér. Il post duess vegnir averts anc per quest onn. Nua ch’il biro dal post d’integraziun vegn ad esser n’è anc betg definì, per Conradin Klaiss stoppia quai dentant esser a Glion e schei pussaivel ensemen cun ils biros da inplus. Uschia pudess inplus p.ex. surprender il servetsch da telefon e garantir, ch’insatgi prendi giu il telefon durant las uras da biro.
RR Actualitad bunura 06:00