Siglir tar il cuntegn

Header

cuntegn

Surselva Nova idea per finanziar la plaiv da Ladir

La plaiv da Ladir ha decidì da na betg persequitar il project da fusiun cun las plaivs da Ruschein, Pigniu, Siat e Rueun. Enstagl vegn l’idea d’ina finanziaziun entras instituziuns e persunas privatas da la bassa concretisada.

audio
Mezdi: Co la plaiv da Ladir vul finanziar ses avegnir
ord Actualitad dals 27.10.2015.
laschar ir. Durada: 2 minutas 49 Secundas.

La votaziun per ni encunter persequitar vinavant il project da fusiun ha dà in resultat pari. En quai cas prevedan ils statuts da la plaiv ina decisiun entras trair la sort. E la sort ha decidì da betg fusiunar. La plaiv da Ladir sto dentant chattar ina nova schliaziun pertutgant la finanziaziun. Cun la nova lescha da finanzas dal Corpus catholicum survegniss la plaiv mo pli rodund in dieschavel da la summa sco fin qua.

Instituziuns e persunas privatas

Durant la radunanza è era vegnì preschentà ina idea da finanziaziun entras instituziuns e persunas privatas da la bassa. Tenor il president da la plaiv da Ladir, Toni Cadruvi, fiss quai betg mo ina garanzia da deficit. Ils iniziants da l’idea prevedan da era pajar il plevon ed ina gronda part dals custs da la renovaziun da la baselgia. Tgi che quellas instituziuns e persunas privatas èn, na vul Toni Cadruvi anc betg tradir.

Cas unic en Svizra

Finanziar la plaiv cun daners d'instituziuns e persunas privatas fiss tenor Toni Cadruvi nov ed in cas unic en Svizra.

Toni Cadruvi, il president da la Plaiv da Ladir.
Legenda: Toni Cadruvi, il president da la Plaiv da Ladir avant la baselgia da Glion. RTR, C. Albin

Durant la radunanza na haja dentant betg dà gronda discussiun e la decisiun da persequitar vinavant quella idea saja stada clara. Il concept final d’uschia ina finanziaziun spera Toni Cadruvi savair preschentar el decurs dal proxim onn.

Artitgels legids il pli savens