La decisiun è crudada unanimamain la mesemna saira. La vischnanca survegn in dretg da precumpra per l'entira immobiglia.
Gia bleras giadas en Svizra
Kristina Schnabel ha cumprà la chasa e la pratica d'Andreas Fischbacher che va en pensiun. Ella è media da chasa ad Augsburg en Germania. Ella ha ragischs en l’Ungaria ed accentuescha ch’ella haja gia daditg empruvà da vegnir en Svizra a lavurar – era perquai ch’ella vegnian gia blers onns en vacanzas a Beiva. Pliras praticas da medi haja ella era visità, ma en Tujetsch saja ella immediat sa sentida bain. En in artitgel en ina gasetta haja ella legì da la vischnanca da Tujetsch che tschertgia ina media. Suenter la visita en Tujetsch sajan sia famiglia ed ella stads persvas da l’offerta ed hajan cumprà la chasa dal medi. Uschia vegn la famiglia Schnabel, cun ses dus figls a sa chasar en la vischnanca da Tujetsch.
Tschertga betg simpla
La tschertga d’ina media n’è betg stada simpla, conceda il president communal da Tujetsch, Martin Cavegn. La vischnanca haja gia avant ses uffizi cumenzà a far ponderaziuns, co agir suenter la pensiun dal medi da chasa Andreas Fischbacher. Per pudair far quai effizientamain, hajan ins elavurà in concept cun pliras variantas. Ina da quellas saja stada, da cumprar la chasa e dar a fit ella ad in medi u ina media, di Martin Cavegn. Ma impurtant saja stà da tschertgar immediat il contact cun las persunas ch'han interess – e quai saja era succedì tar Kristina Schnabel.
L’emprim communabel
En ina emprima fasa vegn Kristina Schnabel a lavurar ensemen cun Andreas Fischbacher. Lez vegn era sustegnair la media durant la stagiun d’enviern. Quai saja ina buna schliaziun che vegnia ad esser d’engrà per tuts, surtut per ils pazients, di Martin Cavegn. La purschida medicinala saja in dals mosaics impurtants per garantir il futur da la vischnanca, tant per la populaziun indigena ma era per tut las turistas ed ils turists.
Ponderaziuns ed arguments avant la decisiun:
