Nova punt da peduns tranter Schluein e Castrisch

La punt da 99 meters lunghezza e 2 meters largezza è reservada a peduns e ciclists e fa part da la senda da viandar tras la Ruinaulta. Ella è la tschintgavla punt per il traffic betg motorisà tranter Glion e La Punt / Reichenau.

Laschar ir video «Avertura da la punt per peduns tranter Schluein e Castrisch»

Avertura da la punt per peduns tranter Schluein e Castrisch

2:45 min, Telesguard dals 22.12.2016

En la punt èn era integrads novs conducts dal consorzi per las auas persas Foppa. Quels conducts mainan l’aua persa da Castrisch sur il Rain anteriur vi en la serenera da Schluein. Uschia po la punt speziala cun ils conducts vegls che sa chatta gest sper la nova punt vegnir spazzada.

Punt anc betg finida dal tut

Era sche la punt n’è anc betg finida dal tut pon peduns e ciclists gia nizzegiar ella. Tenor Claudio Casutt dal biro da planisaziun Casutt Wyrsch Zwicky, che ha planisà e realisà la punt, ston anc vegnir fatgas differentas lavurs pitschnas. Uschia sto era anc vegnir installada ina illuminaziun da LED sut ils tschabargals da la punt. In'illuminaziun cun sensurs da moviment, che s’envida pir cura ch’ina persuna s’avischina a la punt.

La punt maina da la plazza da ballape Crappa Grossa sur il Rain anteriur en direcziun da la staziun da Castrisch. Avrir maletg en lightbox.

Legenda da maletgs: La punt maina da la plazza da ballape Crappa Grossa sur il Rain anteriur en direcziun da la staziun da Castrisch. Grafica RTR

Avertura uffiziala la primavaira 2017

Era sto anc la veglia punt cun ils vegls conducts d’aua persa vegnir spazzada, ina lavur planisada per il favrer 2017. La primavaira ston anc vegnir fatgas lavurs da cosmetica en il conturn da la punt, uschia che l’avertura uffiziala da la nova punt è planisada il matg 2017.

Ils custs per la punt da total 2,1 milliuns francs vegnan surpigliads en parts egualas da l’Uniun Ruinaulta (che promova la senda da viandar tras la Ruinaulta), dal Consorzi per auas persas Foppa e dal chantun Girschun.