La vischnanca da Medel ha uss ina ulteriura attracziun sper la senda dals senns: Ina senda da baselgias e chapluttas.
Picturas deditgadas a dunnas
Quests 12 sanctuaris porschan blers detagls ed istorgias. Sur Giusep Venzin menziunescha la chaplutta da Sontg Bistgaun a Mutschnengia (che datescha da 1500). En quella èn 8 picturas muralas deditgadas a sontgas, ina per exempel a sontga Balugna, in num ch’i deva pli baud en Val Medel. Sontg Bistgaun duai era proteger cunter la pesta.
Picturas da Hans Ardüser
Era a Pardé datti fastizs da questa malsogna. L'aclaun vegn era numnà Sontg Roc, perquai che la chaplutta è deditgada a Rochus da Montpellier, il patrun da la pesta. En quest sanctuari pon ins admirar las picturas muralas da Hans Ardüser (1557-1617) cun ils dudesch apostels.
Il diavel ed in schnec
A Platta è la baselgia parochiala. L’emprima part da quella datescha dal temp romanic (900-1200) cun la tur romana. Il zain pitschen en questa tur mussa detagls interessants. El datescha da 1512:
Quel è deditgà a Sontg Theodul e sin il zain vesan ins il diavel ed in schnec
La senda da baselgias e chapluttas va dal Pass dal Lucmagn cun la chaplutta da Sontga Maria fin tat ils aclauns da Mutschnengia e Soliva cun lur chapluttas.