Set mais è ina gruppa da lavur s’occupada cun la dumonda co ch’ins po salvar l’Uniun da dunnas Mustér. Quai suenter ch’i n'è betg stà pussaivel da chattar la primavaira ina presidenta ed avunda persunas per la suprastanza da l’uniun che dumbra var 250 commembras. Durant la radunanza generala èn Christina Bundi, Astrid Flepp, Rita Furger, Rita Huonder, Manuela Maissen e Jeannette Venzin sa decididas da furmar ina gruppa d’interess e tschertgar ina soluziun per l’uniun avant che laschar ir quella cun ils pes ensi.
Magari ston ins bunamain crudar dal precipizi giu avant ch'ins percorscha ch'ins stuess forsa sa metter sin las chommas davos e gidar la glieud che stat davanttiers per chattar ina cuntinuaziun per ina uniun.
Reorganisà e chattà suprastanza
A la radunanza extraordinaria dal venderdi passà (13.11.2015) ha la gruppa d’interess pudì preschentà il resultat da lur ponderaziuns. La structura prevesa ina suprastanza da trais empè ina da tschintg. Uschia è Katrin Pally vegnida elegida sco presidenta, Christina Làbas sco co-presidenta e Rita Furger sco cassiera. Sper la reducziun da la suprastanza èsi vegnì surdà tuts il ressorts, sco per exempel uffants pitschens, fiera da resti, occurrenzas etc. a mintgamai duas dunnas. Questas mettan ensemen in program ed in preventiv per lur ressort, laschan approvar quel da la suprastanza e lavuran silsuenter autonom. Sco Rita Huonder da la gruppa d’interess declera hajan ins tschernì questa varianta per prender davent lavur a la suprastanza e reparter la lavur sin dapli persunas.
Prontas da sa gidar dentant betg en suprastanza
Sco Rita Huonder di saja quai la finala stà simpel da chattà dunnas per surdar quests posts, ina giada che las structuras sajan stadas cleras. Avant che far las midadas vid las structuras èsi vegnì fatg ina retschertga tar tut las dunnas da Mustér cun in questiunari. Cun quel han ins vulì savair tge che las dunnas spetgan da l’uniun e sch’i dovria insumma anc l’Uniun da dunnas, declera Astrid Flepp che ha evaluà ils var 100 questiunaris ch’èn vegnids returnads. Ils questiunaris han mussà ch’ils interess da las dunnas giuvnas sajan in pau differents da quests da las dunnas in pau en ils onns. I saja dentant era stà visibel ch’i dettia persunas che sajan prontas da sa gidar e ch’ins giavischa che l’Uniun da dunnas existia enavant.
Jau m’allegra da fa insatge ensemen cun las dunnas davent da 25 onns fin 80 e dapli.
Il pensum da metter ils differents interess sut in tetg ha la nova presidenta Katrin Pally. La motivaziun da surpigliar il post saja ch’ella veglia uschia che las mammas giuvnas fetschian era part activ da l’uniun. La nova suprastanza cun Katrin Pally a la testa surpiglia ses uffizis cun l’entschatta schaner.