Siglir tar il cuntegn

Header

cuntegn

Surselva Nova uniun prepara la plazza da glatsch a Danis/Tavanasa

Enfin l'onn passà han privats fatg la plazza da glatsch en lavur cumina. Dapi quest onn fa quai l'Uniun Patinera Danis/Tavanasa.

Il pli impurtant en curt

  • L'Uniun Patinera Danis/Tavanasa fa davent da quest onn la plazza da glatsch.
  • Alexander Caduff ha inizià quella uniun per pudair finanziar il mantegniment da la nova maschina da schubregiar il glatsch.
  • La maschina sezza n'ha custà nagut, ella ha gia pli che 40 onns.

audio
Uniun Patinera Danis-Tavanasa
ord Total local dals 22.12.2017. Maletg: RTR, C. Albin
laschar ir. Durada: 2 minutas 58 Secundas.

Ils onns 1989/90 han las ovras electricas Rein Anteriur bajegià la centrala ed il batschigl da regulaziun a Danis/Tavanasa - il batschigl gest en il lieu nua ch'ils abitants da la vischnanca faschevan mintga enviern in glatsch. Perquai mettan las ovras dapi lura a disposiziun in champ da tschella vart dal Rain, gest sper la halla da maschinas. Uschia hai dà vinavant in glatsch a Danis/Tavanasa. Enfin l’onn passà è quel vegnì fatg en lavur cumina da privats. Dapi quest onn fa quai l'Uniun Patinera Danis/Tavanasa.

La «Zamboni» è la culpa

Zamboni

Avrir la box Serrar la box

Frank J. Zamboni è il num da l’interprendider american che ha inventà 1949 ina maschina da schubregiar plazzas da glatsch. L’interpresa Zamboni a Paramaount, California, exista anc oz ed il num «Zamboni» è daventà sinonim per maschinas da schubregiar plazzas da glatsch.

Fundà l'uniun ha Alexander Caduff, quai per finanziar la maschina da schubregiar il glatsch. La maschina sezza ha custà nagut - ella ha gia pli che 40 onns - char è il mantegniment da la maschina. Ord quai motiv ha el dumandà parents ed enconuschents da Danis e Tavanasa, sche els fissan pronts da s'engaschar en ina uniun. Il resun è stà positiv, ed uschia ha l'uniun gia 22 commembers activs e 2 passivs.

Senza fauturs na giess quai betg

Era cun il grond engaschi dals commembers, l'agid d'interpresas e da la vischnanca na giess quaii betg. Uschia mettan las ovras electricas a disposiziun il terren e dattan gratuit l'electricitad. Plinavant po l'uniun duvrar ina tegia da lenn gist sper la plazza da glatsch sco gardaroba. La vischnanca dat gratuit l'aua per far glatsch plus anc ina contribuziun finanziala. Ina interpresa da bajegiar metta a disposiziun in container che vegn duvrà sco garascha per la maschina da far glatsch.

Plazza da glatsch per mintgin

Las commembras ed ils commembers da l'uniun s'organiseschan tranter els per metter si las bandas, far il glatsch e schubregiar el cun la maschina. Averta è la plazza da glatsch - sche l'aura e la qualitad dal glatsch lubescha - mintga di davent da las 9:00 enfin las 21:30 e quai per in e scadin. L'entrada è gratuita, i dat sulet ina cassa en la gardaroba, nua che visitaders pon metter en ina donaziun sche els vulan.

Artitgels legids il pli savens