La fusiun da las vischnancas Mundaun ed Obersaxen/Sursaissa è sut tetg. La vischnanca da Mundaun ha ditg gea cun 82 encunter 9 vuschs tar ina abstenziun, ed ils dad Obersaxen/Sursaissa han acceptà la fusiun cun 105 gea ed 11 na. La fusiun n'è betg stada dispitaivla, cunquai che tant la dumonda da linguatg (da daventar bilings) sco er quella da la fusiun da las scolas eran gia decididas ordavant.
La nova vischnanca porta il num Obersaxen Mundaun. Cun questa fusiun dumbra la nova vischnanca 1'127 abitants. Il chantun sustegn la fusiun cun contribuziuns da 1,9 milliuns francs.
Il pe da taglia per la vischnanca fusiunada è 100% da la taglia simpla dal chantun. Mundaun aveva fin uss in pe da taglia da 120%, ed Obersaxen/Sursaissa in da 130%. La fusiun duai ir en vigur cun l'entschatta da l'onn 2016.