Ils 26 da november 2015 ha la secziun Surselva d’impressaris constructurs gì sia davosa radunanza generala extraordinaria. La suletta decisiun è stada quella da schliar l’uniun. Davent dals 1 da schaner 2016 è l’uniun integrada en la Societad grischuna dals impressaris constructurs (SGIC), che survegn davent da quella data era ina nova structura.
4 regiuns enstagl da 8 secziuns
Enfin uss eran ils impressaris grischuns organisads en 8 differentas secziuns. Quellas secziuns eran organisadas sco uniuns, cun 8 differents statuts ed 8 differentas suprastanzas. Nov vegni mo pli a dar in'uniun, numnadamain la Societad grischuna dals impressaris constructurs (SGIC) cun las 4 regiuns Surselva, Grischun dal nord, Grischun central e Grischun dal sid. L’anteriura secziun Surselva daventa simplamain la regiun Surselva. La regiun Grischun dal nord sa cumpona da las secziuns Foppa, Plessur, Landquart, Partenz e Tavau. La regiun Grischun central èn las secziuns Viamala, Alvra e Moesa. Las secziuns Malögia, Bernina, Engiadina bassa e Müstair furman da nov la regiun Grischun dal sid.
Betg avunda commembers
Tenor Andreas Felix, il directur da la Societad grischuna dals impressaris constructurs (SGIC), è quella midada da structura cunzunt vegnida necessaria perquai ch'insaquantas secziuns pli pitschnas n'hajan betg pli avunda commembers. Entras fusiuns ni era falliments saja il dumber d’impressaris sa reducì en quellas secziuns ed i na saja betg pussaivel da mantegnair las singulas uniuns. En la nova structura tramettan las 4 regiuns mintgamai 2 delegads en la suprastanza da la SGIC. Cun quella nova structura saja il contact tranter la SGIC e las regiuns pli stretg e direct.
