Siglir tar il cuntegn
Inhalt

Surselva Novs stabiliments publics en Lumnezia

In local da pumpiers, ina fermada da posta, tualettas publicas ed in passape. Quai è en ils novs stabiliments che vegnan bajegiads ad Uors en Lumnezia sut.

Las palas en furadas en la terra e la glieud far viva sin ils novs stabiliments.
Legenda: Blers da Suraua èn vegnids per festivar l'emprima badigliada dal local da pumpiers. RTR, L. Livers

Cun la fusiun da Suraua l'entschatta dals 2000 en era ils pumpiers da Suraua s’organisds da nov. Mintga vitg ha survegnì in local da pumpiers cun la rauba adequata per l’emprima attatga. Il local ad Uors era plitost pitschen e perquai è vegnì planisà là in nov local. Dentant senza gronda prioritad, quai na fageva betg prescha.

Ussa fai prescha

Strusch 10 onns suenter la fusiun, stat gia la proxima fusiun avant porta, la fusiun cun la Lumnezia, ed ussa fai prescha. Suraua smatga atras in credit da 500'000 francs per in local da pumpiers e quai anc avant che la fusiun va en vigur.

Duri Blumenthal, il president da la vischnanca Lumnezia, manegia ch'ils da Suraua hajan gì cletg. Cun spetgar e ponderar saja il project che vegn ussa realisà bler meglier per la fracziun da Suraua.

L'emprim project avess custà radund in mez milliun francs, ussa vegn investì passa in milliun. La tema che la nova vischnanca n'investeschia betg a Suraua na saja betg stada gista.