Siglir tar il cuntegn

Surselva Nua van Vuorz ed Andiast?

La fusiun da Vuorz ed Andiast u cun Glion u cun Breil, è ina fusiun sco quai ch’i n'ha anc mai dà en il Grischun. Per las duas vischnancas Vuorz ed Andiast vegnan en il medem mument gest duas variantas da fusiun scleridas.

Sper la via principala ils mussavias per las duas vischnancas Vuorz ed Andiast.
Legenda: En tge direcziun sa movan Vuorz ed Andiast? RTR, L. Livers

Las perscripziuns chantunalas laschan en in tal cas avert pliras variantas per las duas vischnancas. Fusiunar pon ellas dentant mo communabel, u cun Breil u cun Glion. Che Vuorz ed Andiast fusiuneschan be in cun l’auter, n’è betg previs. Restar persulas sco gia fin ussa, è dentant era ina varianta pussaivla.

Incorporar e betg fusiunar cun Glion

Il manader da quest project da fusiun è Ursin Fetz. El ha gia manà la fusiun gronda da Glion Plus. Quest nov project da fusiun declera el uschia: «Las fusiuns cun ina da las duas vischnancas grondas Breil u Glion èn pulitamain differentas. Uschia è la fusiun cun Breil ina fusiun ch’i dat gia sin il palpiri e che sto sulettamain vegnir adattada cun las cifras novas. La fusiun cun Glion perencunter n`è betg ina fusiun en il senn classic. Là vegni plitost a dar ina incorporaziun da las duas vischnancas en la vischnanca gronda gest fusiunada.»

Anc betg enconuschent èn ils termins da votaziun per quest project da fusiun. Primavaira proxima quintan ins da pudair dar scleriment a la populaziun.