Butias alternativas vendan per il solit products ch'i na dat uschiglio betg tar mintga distributur grond. Pia per exempel products vegans, regiunals e biologics. Ils ultims onns han bleras da quellas stuì cumbatter ed han per part er stuì serrar. In exempel è la stizun da «Oba Aba» a Cuira.
Oba aba – La stizun da «zero waste»
«Oba Aba» era ina butia cun in concept da «zero waste». Quai vul dir ch'ins na producescha nagin rument, sch'ins fa cumpras là. Il december 2018 ha la stizun avert ed il matg 2022 ha ella stuì serrar. Tenor Andrina Caprez, cofundatura e comanadra hai dà differents motivs pertge ch'els han finalmain stuì serrar la butia:
Ils concerns gronds porschan adina dapli products alternativs e spezials e per il solit per pretschs pli bass. Il pli grond success ha la stizun gì l'onn da pandemia 2020. Lura sajan stadas en moda butias alternativas pli pitschnas e temas sco persistenza e protecziun d'ambient.
Il team saja stà fitg trist cura ch'els han stuì serrar la butia. Ma la cofundatura Andrina Caprez di ch'els sajan fitg leds ch'i dettia ina nova butia da «zero waste» cun il medem concept, uschia che l'idea d'in consum pli persistent resta.
Essenza – Ina stizun alternativa cun success
Essenza è ina butia alternativa a Mustér che venda vestgadira, products da cosmetica ed ed anc bler dapli. La manadra da fatschenta Alexandra Flepp ha avert «Essenza» avant 1 onn e 4 mais cun la finamira da promover ina vita pli persistenta. La gronda part da la clientella èn las persunas indigenas che vegnan adina puspè en stizun per cumprar insatge, ma per part er per discutar cun la manadra da fatschenta davart temas sco durabilitad e persistenza.
Il recept per il success saja per Alexandra Flepp ina maschaida tranter in sortiment vast e spezial e l'abilitad da star 100% davos ses products e lur origin. Er impurtant saja quai dal tuttafatg da star tar las valurs che vegnan represchentadas da la butia.
Igl è per mai impurtant ch'ins vegn en stizun e sesenta bain e senta ch' ins fa quai cun fitg grond plaschair e cun il pli grond anim ch'ins ha.
Alexandra Flepp bada er la concurrenza dals gronds concerns. Perquai vul ella offrir a ses clients e clientas ina plivalur cun ina vasta purschida da products che concerns pli gronds na pon betg offrir.
Or da l'archiv
