En l’Ogna vegnan mussadas mintg’onn inscenaziuns che giogan cun l’acustica e l’atmosfera en la sculptura accessibla da Matias Spescha a Trun. Per l’emprima giada saja quai ina inscenaziun cun musica e saut cumponì exclusiv per l’Ogna, di Lisa Schmidt-Candinas, la presidenta da la fundaziun. La gruppa saja vegnida envidada da crear quai toc ed els hajan passentà duas emnas quasi en l’Ogna. Il toc saja uschia naschì ord l’improvisaziun, di Estelle Costanzo. Ella haja prendì poesias sco inspiraziun, ma era la cuntrada ed il ruaus. Communabel cun Alicja Pilarczyk che suna la violina, e la sautunza Wilma Puentes ed il sautunz Hillel Perlman, hajan els alura creà il toc.
Giugar cun la sculptura che fa era musica
Uschia saja naschì in toc cun il tema principal da las nivlas. Quai haja inspirà la creaziun dals costums en alv e cler-blau. La musica saja leva ed en cumbinaziun cun il saut emprovian els da crear in'atmosfera unica, di Costanzo. Per ella che suna l’arpa n’è betg sulet la musica impurtanta. Uschia sautan tuts quatter e cumbineschan era la musica cun il moviment. La sculptura vegn nizzegiada en sia entira grondezza ed era las pitgas da metal vegnan duvradas per far musica.
L’aura fa quitads
La prognosa da l’aura per las duas preschentaziuns, il venderdi ils 30 da fanadur e la sonda ils 31 da fanadur, n’è betg propi buna. Uschia èsi da quintar cun plievgia. Ins saja il mument vida far ponderaziuns da proteger almain ils instruments da la plievgia. Ma las producziuns lessan ellas, sche mo pussaivel, realisar, di Estelle Costanzo.