Siglir tar il cuntegn

Header

Navigaziun

Legenda: Guardar il video Parc Adula - la val dal Blegn ha grond interess, e gronda paisa. Durada 03:10 minutas.
Or da Telesguard dals 20.10.2016.
cuntegn

Surselva Olivone: 500 a l'infurmaziun dal Parc Adula

La populaziun da la vischnanca dal Blegn ha mussà grond interess a la saira d'infurmaziun. Var 500 persunas èn stadas ad Olivone.

La vischnanca dal Blegn è fitg impurtanta per il Parc Adula. In terz da la surfatscha en la zona centrala sa chatta sin territori da la vischnanca dal Blegn. Quai èn var 54 da total 142 km2 zona centrala. Tenor l’ordinaziun federala per parcs da la natira, dovri almain 100 km2 en la zona centrala. Quai che na fiss betg il cas senza la vischnanca dal Blegn. Uschia eran ils promoturs er in pau gnervus avant che l’infurmaziun ha cumenzà. Entant ch’ils ins han testà la tecnica han auters anc ina giada studegià tge ch’els vulan raquintar.

Biosfera Val Müstair sco exempel

L’infurmaziun ha cuzzà prest trais uras. En quellas è vegnì infurmà davart il parc sco tal. Dentant è era vegnì preschentà la Biosfera Val Müstair sco exempel d’in parc.

In’ulteriura part è stada la pussaivladad da far dumondas. En questa part hai dà votums pro e contra ed inqual dumonda.

Temas e speranzas

Ils preschents che han gia in’opiniun davart il Parc Adula, argumenteschan quella fitg different. Entant ch’ils aderents vesan il parc sco schanza da pudair promover l’economia e da franar la depopulaziun, han ils adversaris tema ch’i dettia anc bler dapli leschas che prendan davent la libertad e che las organisaziuns d’ambient hajan anc bler dapli pussaivladads d’impedir projects economics.

var 500 persunas èn stadas a l'infurmaziun ad Olivone.
Legenda: var 500 persunas èn stadas a l'infurmaziun ad Olivone. RTR, F. Belotti

Cuntent cun la saira d'infurmaziun

Ils promoturs dal Parc Adula èn stads cuntents cun la saira d’infurmaziun. Tenor il directur dal parc, Martin Hilfiker hajan ins er pudì respunder a las dumondas criticas.

Da persunas ch’èn cunter il parc han ins udì ch’els n’hajan gnanc gì avunda temp e la pussaivladad da s’exprimer. Martin Hilfiker ha chapientscha per questa rinfatscha. In’ura e mesa saja forsa stà memia curt per la discussiun. Il november dettia quai dentant anc ina discussiun da podium ad Olivone cun trais persunas ch’èn per e trais ch’èn cunter il parc. Uschia è el persvas ch’ils adversaris dal parc hajan la pussaivladad da vegnir a pled.

Ils 27 da november vegn enconuschent sche las 17 vischnancas dal Grischun e dal Tessin ch’èn en il perimeter dal Parc Adula han votà per u cunter il parc.

Las proximas sairas d’infurmaziun:

  • gievgia, 20 october: Mesocco
  • glindesdi, 24 october: Val
  • mardi, 25 october: Vrin
  • mesemna, 26 october: Sumvitg
  • gievgia, 27 october: Valragn