Siglir tar il cuntegn

Header

cuntegn

Omeopatia per animals Maun en maun e betg in cunter l’auter

Era per animals datti tgira a moda omeopatica. Adina dapli possessurs d’animals tschertgan vias per pudair evitar da dar als animals antibiotica e da tgirar lur animal a moda omeopatica. Impurtant è dentant che la tgira va maun en maun e che l’animal profitescha e na sto betg patir.

La medischina alternativa vegn era duvrada ozendi per giats, chauns, chavals u vatgas. Dapi blers onns lavura era la pratica da veterinari Capricorn a Glion cun quella, surtut cun omeopatia.

audio
Il veterinari Fadri Vincenz davart medischina alternativa per animals
02:44 min, Actualitad dals 22.06.2021.
laschar ir. Durada: 02:44 minutas.

Bab sco piunier da la medischina alternativa

Sco il veterinari Fadri Vincenz di, dovrian els quasi mintga di la medischina alternativa. El saja creschì si cun omeopatia per animals da niz, ses bab Erwin saja stà in piunier en quest sectur.

Era cura che jau hai cumenzà a studegiar, è quai adina stà cler, ch’i dat per mai la medischina da scola e la medischina cumplementara. Quai va maun en maun.
Autur: Fadri VincenzVeterinari e commember da la direcziun

Evitar antibiotica

El conceda dentant, ch’ins na possia betg duvrar l'omeopatia per mintga mal e malsogna. In remedi enconuschent saja per exempel l’arnica; ma sch’in animal haja rut ina chomma, stoppian ins operar. L'omeopatia possia dentant gidar a sustegnair il process da l’operaziun. Era Placi e Cornelia Monn che han dapi quasi 20 onns chauns, han vulì evitar da dar antibiotica a quels. In da lur chauns ha gia da pitschen gì da sbatter cun eczems, uschenumnads hotspots. Cun la tgira medicinala vegniva quai bun ma returnava pli tard puspè. Suenter avair survegnì in tip dal pur vischin che tgirava las vatgas cun omeopatia, èn els era sa decidids dad empruvar quella via e quai ha alura gì success.

La maglia da chauns è quasi il pli impurtant

Dapi paucs onns ha Cornelia Monn, che ha cun ses um dapi plirs onns ina tratga da chauns «Golden Retriever» dal raz da lavur, cumenzà a sa fatschentar cun la maglia dals chauns. Suenter ditg tschertgar, ha ella chattà maglia cun ina pli gronda cumpart da charn e senza chemicalias u supplements. Uschia possian ins tar ina malsogna u in mal dar supplementarmain ervas u era bulieus en la maglia ed uschia gist tgirar l’animal.

audio
La possessura da chauns Cornelia Monn ha fatg bunas experientschas cun medischina alternativa
03:18 min, Actualitad dals 22.06.2021.
laschar ir. Durada: 03:18 minutas.

Ils bulieus vitals sajan surtut buns per tgirar malsognas sco cancer. Ins na possia betg curar pli, ma levgiar als animals il mal e quai saja savens la meglra terapia che laschar far per exempel chemoterapia, di Cornelia Monn. Impurtant tar l’omeopatia saja da laschar temp per medegiar e betg avair l’impressiun che tut stoppia esser bun entaifer 24 uras. En la scena da chauns saja la chapientscha per la medischina alternativa creschida fitg ils ultims onns. Si en Surselva na saja quai dentant anc betg uschè actual – sulet per vatgas ed animals pli gronds, ma per chauns manchian purschidas sco curs per ils possessurs d’animals.

Osteopatia è ina metoda fitg fina

Ils chavals n’èn betg fatgs per chavaltgar, di Anita Voskamp che ha dapi blers onns chavals. Perquai èn ils mals vi da las chommas dals chavals savens mals secundars che vegnan dal dies. Cun l'osteopatia ch’è ina metoda fitg fina possian ins levgiar quels mals ed uschia savens tractar ils mals da chavals u er da chauns, di la dunna ollandaisa. Suenter avair lavurà blers onns cun sportists professiunals è ella sa scolada sco osteopata da chavals. I saja adina stà cler, ch’ella veglia in di lavurar cun animals e perquai fetschia ella uss sia lavur da siemi.

audio
Anita Voskamp è osteopata per chavals
03:19 min, Actualitad dals 22.06.2021.
laschar ir. Durada: 03:19 minutas.

La scolaziun ha la dunna ollandaisa fatg en sia patria ed alura pudì lavurar plirs onns tar la polizia da chavals ad Amsterdam. Da là ha ella era pudì cumprar ses chaval preferi, ch’ella posseda anc oz. Suenter la scolaziun ha l’amur manà ella a Mustér, nua ch’ella viva oz. La lavur dad osteopata maina ella però tras quasi l’entira Svizra. La Surselva n’ha betg avunda chavals per pudair surviver sulet qua, ma ella fetschia gugent ils turs da plirs dis, per exempel en l’Engiadina, nua ch’ella ha blera clientella.

RTR actualitad 07:00

Artitgels legids il pli savens

Scrollar a sanestra Scrollar a dretga