Siglir tar il cuntegn

Header

Cun il di supplementar la gievgia ha l’Open Air Lumnezia gì tant visitaders sco anc mai.
Legenda: Cun il di supplementar la gievgia ha l’Open Air Lumnezia gì tant visitaders sco anc mai. RTR, L. Livers
cuntegn

Surselva Open Air Lumnezia fa tant gudogn sco anc mai

L'Open Air Lumnezia ha fatg quest onn in gudogn da 240’000 francs – tant sco anc mai. Quai è vegnì enconuschent sonda saira da la radunanza generala da l'uniun purtadra a Cuschnaus. Er la svieuta è creschida per passa 40%, dad 1,5 sin 2,1 milliuns.

Tenor il president dal comité d'organisaziun, Norbert Cavegn, saja il bun resultat cunzunt d’engraziar al di supplementar da l’open air. Quest onn ha l’open air avert las portas gia la gievgia. Ils organisaturs avevan quintà lez di cun 1’500 visitaders, arrivads èn passa 4’000. Ultra da quai hajan els gì bands attractivas ed els hajan per l’emprima giada savì far reclama sin l’emettur da radio SRF3.

Norbert Cavegn, il president dal comité d'organisaziun da l'Open Air Lumnezia.
Legenda: Norbert Cavegn, il president dal comité d'organisaziun da l'Open Air Lumnezia. RTR, P. Bigliel

Puncts da critica

Dus puncts èn vegnì crititgads dals visitaders da l’Open Air Lumnezia 2015

La controlla da segirtad a l’entrada na saja betg stada organisada bain, cunzunt la gievgia. Era haja i dà memia paucas tualettas sin l’areal da l’open air.

Quests dus puncts ha il comité d’organisaziun mess sisum la glista da midadas. Els veglian reorganisar dal tuttafatg la controlla da segirtad ed era planisar dapli tualettas per las visitadras ed ils visitaders da l’open air.

Contract da locaziun per il terren anc betg suttascrit

In punct anc avert è il contract da locaziun per il terren da l’areal da l’open air. Il possessur da quai terren ha visà il contract ed in nov contract n’è anc betg suttascrit. Cun l’agid da Curdin Foppa sco mediatur, spera Norbert Cavegn savair suttascriver in nov contract enfin la fin da l’onn. L’anteriur manader dal Plantahof saja in um dal fatg che sappia, tge valur ch’il terren haja e tge lavurs da reparaziun che sajan necessarias.

Mo a Degen

Sche i na dettia betg in nov contract da locaziun per il terren, na dettia tenor Norbert Cavegn era betg in Open Air Lumnezia. Il lieu actual sper Degen saja ideals. Els hajan investà bler ils davos onns en l’infrastructura dal lieu. I na saja betg pussibel d’organisar l’open air en in auter lieu.

Open Air Lumnezia
Legenda: Open Air Lumnezia. RTR

RR novitads 09:00

Artitgels legids il pli savens

Scrollar a sanestra Scrollar a dretga