Il schef dal festival, Norbert Cavegn guarda cun brama enavon sin ils concerts da bands sco Patent Ochsner, Ofenbach u Hecht. I vegnia puspè a dar ina gronda festa.
L'organisaziun è per el, ch'è dapi decennis da la partida, gia quasi rutina. Ma tuttina datti mintg'onn puspè tensiun. Igl è da sperar ch'i na dat nagins incaps e naginas nauschas surpraisas. Tgi na sa regorda betg vi dals blackouts electrics ils ultims onns. Las preparaziuns hajan dentant funcziunà fitg bain ed els sajan pronts per il pli grond festival dal Grischun.
Buna prevendita
In festival vendì ora è la gronda finamira da mintga open air. E per l'Open Air Lumnezia guardi ora fitg bain, declera Norbert Cavegn. Las cifras da la prevendita 2025 èn meglras che l'onn passà, cura ch'il festival ha dumbrà 17'700 entradas tar ina capacitad da 18'500. Uschia di il schef da l'Open Air Lumnezia era ch'el saja, cuntrari a l'onn passà, fitg cuntent cun la prevendita. Cifra concretas na vul el dentant betg tradir. Sch'el guarda en la scena hajan els dentant, tut en tut, che giaja meglier cun la prevendita che auters bigliets. Quai tenor ses sentiments e discurs cun auters open airs.
Jau pos be cussegliar, che tgi che vul vegnir a l'open air, na duai betg sperar sin la cassa da la saira.
Ils temps ch'ils open airs eran vendids ora mais avant l'event èn dentant passads. Sch'ins guarda enavos: Il 2019 è l'open air gia stà vendì ora fin avrigl, il 2018 cumenzament zercladur. Suenter corona ha il festival a Degen gì da cumbatter pli fitg da vegnir tar la glieud. Ils dus ultims onns n'èn betg tut ils blgliets vegnids vendids. Quest onn pudess quai puspè sa midar. Per ils organisaturs enturn Norbert Cavegn fiss quai il pli grond regal sin il 40avel anniversari da l'Open Air Lumnezia.
