L'Openair Lumnezia duai avair lieu quest onn tuttina sco avant la pandemia. Uschia na vesa il president dal comité d'organisaziun Norbert Cavegn il mument nagins craps da stgarpitsch. Els sajan londervi da planisar sco sch'i n'avess mai dà la pandemia. Vul dir, els hajan cumenzà là nua ch'els hajan chalà avant dus onns.
Craps da stgarpitsch, sco quai ch'i sa sviluppescha il mument, na ves'jau nagins. Ins sto patratgar positiv, ma gea, nus essan da l'avis che nus pudain realisar quest openair.
Er vi dal program na vegnia betg a dar grondas midadas cumpareglià cun ils plans d'avant dus onns. Il line-up en detagl vegnian els a communitgar proximamain ha ditg Norbert Cavegn, tenor la pagina d'internet ils 24 da mars. In plan b per l'Openair Lumnezia na dettia il mument betg. Il festival da trais dis, cun in public da tut en tut 18'500 persunas, ha lieu l'ultima fin d'emna da fanadur a Degen en Val Lumnezia.
Optimissem er entaifer la branscha
Els sajan stediamain en contact cun differents acturs en la branscha da festivals svizra. Ins sentia che la motivaziun saja qua e ch'ins vesia l'orizont, uschia Norbert Cavegn. I na saja il mument er betg impurtant sch'i vegnia la finala organisà cun u senza certificat. Pertge sch'ins guardassia uss gia sin tut, lura dessia adina in motiv per betg organisar. Tenor el fiss quai però la faussa via.