Siglir tar il cuntegn
Inhalt

Surselva Opera Viva puspè enavos a Cuort/Meierhof

Quatter giadas opera a Cuort, lura duas giadas sper il Rufalipark a Misanengia, ed ussa puspè enavos a Curt. L’Opera Viva a Sursaissa ha midà plaz e quai ha ina raschun.

La tenda a Cuort cun ina magnifica survista encunter Vuorz e Breil
Legenda: La tenda a Cuort ha bunamain 700 plaz mad

Ins sto enconuscher l’istorgia da l’Opera Viva per chapir quest pass. Suenter il success da l’opera Nabucco l’onn 2010 han ils organisaturs vulì crescher, per crescher ha i duvrà in nov plaz e quai è sta a Misanengia. Mo la aveva la tenda cun 900 persunas plaz. La midada n’è dentant betg gartegiada. La tenda è stada memia gronda. Ils organisaturs na vegnivan betg d’emplenir ils plazs. Gia il 2014 han els puspè fatg l'Opera Viva en la tenda pli pitschna.

I ha duvrà ina decisiun

Sco quai che Kevin Brunold dal comité d’organisaziun di è il proxim pass stà quel, da ponderar da puspè turnà a Cuort/Maierhof.

Igl avantatg dad esser gest sper il parcadi cun 300 plaz da las pendicularas, ed uschia pudair desister sin transports cun bus, ha la finala stà il punct decisiv per il vegl plazzal per l’Opera Viva a Cuort. Els hajan propi stuì decider tranter dus buns plazs sincerescha Kevin Brunold.

Finanzialmain sajan omadus plaz quasi tuttina, vul dir omadus possessurs faschian fitg bunas cundiziuns per l’Opera Viva. Ils possessurs en d'ina vart la vischnanca sco acziunaria principala dal Rufalipark e da l'autra vart las pendicularas da Sursaissa Mundaun per il plaz a Cuort.

Pli confortablas sutgas

La tenda da quest onn a Sursaissa è la medema sco quella da l’onn 2014 pia cun bunamain 700 plaz. La novaziun sajan sutgas pli confortablas, ha ditg Kevin Brunold. En la tenda gronda a Sursaissa vegn manà si quest onn l'opera Guglielm Tell da Gioachino Rossini. Davent dals 29 da fanadur fin ils 14 d'avust datti 10 producziuns.