Duess quai anc dar ina partiziun da naschientschas? Co vesa ora il futur da la partiziun d’uffants? U duess quai dar mo in ospital ambulant? Dumondas che fatschentan tranter auter era Gieri Cathomas ch'è dapi in on president dal cussegl d’administraziun da l'Ospital regiunal Surselva.
Mia diagnosa è che l'ospital viva, che l'ospital ha fitg buns collavuraturs e che l'ospital ha era in fitg bun futur. Ed era che nus stuain avair ina fitg buna purschida per la sanadad en Surselva.
Gieri Cathomas, oriund da Sumvitg, ha studegià medischina. Però magari spert ha el midà da la medischina sin manager en il sectur da sanadad. Tranter auter ha el manà ina clinica da botox a Turitg. Durant la pandemia ha'l era manà projects tar ils tests da spida. Dapi in onn è el ussa president dal cussegl d’administraziun da l’Ospital regiunal Surselva.
Partiziun da naschientschas
Fin a la fin da quest onn è la neonatologia en mintga cas anc en funcziun. Co ch'i va lura enavant, n'è betg anc cler. Per garantir il manaschi da questa partiziun dovri numnadamain dus medis d’uffants. In va dentant en pensiun, e quella successiun n'è anc betg reglada.
Deplorablamain sa reduceschan ils cas da las naschientschas a Glion. Sche parturir tutga tar il provediment da basa, è difficil da respunder – cunzunt sch'ins sa che tut ils cas cun cumplicaziuns van gia ussa en auters ospitals.
Da mantegnair vinavant quella partiziun sco prestaziun da basa n'è tenor Gieri Cathomas betg uschè simpel. Quai surtut perquai ch'il dumber da naschientschas è sa reducì ils ultims onns da 150 sin 100 naschientschas l’onn. Ed il trend giaja en quella direcziun.
Ospital ambulant - u betg
Manar l’ospital sco ospital ambulant, pia senza partiziun da letgs, è ina da pliras variantas che resultan d’in studi che la SanaSurselva ha laschà far. En la SanaSurselva èn organisadas las vischnancas purtadras da l’ospital. Dentant tenor las delegadas ed ils delegads da la SanaSurselva e era tenor Gieri Cathomas, n'è quai betg ina varianta che cuntenta. Els èn persvas che la Surselva dovra in ospital cun staziun da letgs. La decisiun definitiva en chaussa n’è dentant anc betg tratga.
I n'è betg la dumonda, tge che la Surselva dovra. La dumonda è: tge èn las vischnacas ablas da pajar.
Insumma spetgan ils responsabels da l’ospital sin la strategia dal chantun. En quella strategia cusseglia il chantun als ospitals, tge purschidas ch’els duain mantegnair e tgeninas betg. Quella strategia publitgescha il chantun ils 20. da matg.