Dapi trais onns scriva L’Ospital regiunal Surselva cifras cotschnas. Il november passà ha la SanaSurselva decidì da laschar intercurir las purschidas dal spital. In studi latiers è sin maisa, decider co vinavant cun l’ospital vuleva la SanaSurselva atgnamain quest zercladur. La suprastanza da la SanaSurselva ha uss dentant spustà la decisiun sin quest atun.
Tenor René Epp, il president da la SanaSurselva, n'hajan ils responsabels da la SanaSurselva anc betg pudì decider davart las purschidas futuras da l’ospital, perquai che la suprastanza ha vulì far ulteriuras discussiuns cun persunas decisiva da l’ospital – cul dir cun ils schefmedis.
La finamira èsi da prender l’october, november ina decisiun finala.
Ils fatgs finanzials èn cun il studi sin palpiri, ils discurs cun las persunas decisivas da l'ospital spital èn fatgs. Ussa haja la Sanasurselva d'evaluar quels ed alura suttametter in messadi per mauns da las delegadas e dals delegads. La Sanasurselva veglia en in proxim pass anc discurrer cun il cussegl administrativ da l'ospital e silseunter infurmar las vischnancas sur dal cuntegn dal messadi davart las purschidas. Quai saja era stà il giavisch da las delegadas e dals delegads, uschia René Epp. La finamira saja da prender l’october, november ina decisiun finala.
Ha la populaziun anc in pled davart las purschidas futuras?
Per discussiun durant la radunanza da delegads e delegads ha procurà la dumonda, sch’il pievel duai vegnir involvà en il process da decisiun pli tard. Tenor René Epp saja la cumpetenza tar la radunanza da delegadas e delegads. Tranter las delegadas ed ils delegads hai dentant era dà vuschs che preferissan ch’il suveran po prender posiziun.
«La basa per decider fiss avant maun, la decisiun sezza dentant betg. Ils resultats da l’analisa co ch’i va vinavant cun l’ospital a Glion – preschentada l’avrigl passà – èn numnadamain clers.
Da las variantas evaluadas preferissan ils spezialists da la PwC ord vesta economica e finanziala in ospital ambulant – senza letgs staziunars – ni, perquai che quai n’ha politicamain nagina schanza per il mument, in ospital cun ina purschida reducida: senza pediatria, ginecologia ed ina partiziun da naschientscha mo ambulanta. Enstagl da preschentar ina decisiun, vegn uss dentant fatg ina runda supplementara cun ils medis dil spital – malgrà che quels èn er schon stads involvads en l’elavuraziun da las propostas entras ils spezialists.
Ch’ils medis emprovan d'influenzar las purschidas da l’ospital è legitim. Ch'ils responsabels acceptan quai, è dentant da deplorar. Puspè ina giada èn ils responsabels, ch’èn laics en fatgs da sanadad betg stà en il stan da tegnair pitg als medis sch’i va per stritgar prestaziuns sin il fundament da fatgs. Che la proposta che vegn preschentada l’atun è uschè radicala sco quellas da la PwC è da dubitar.
In pau speranza dat uss silmain il nov president dal cussegl d’administraziun da l’ospital: Gieri Cathomas. Era sch'el n’ha betg vulì pigliar posiziun avant las medias, ha el laschà sentir en sia preschentaziun avant ils delegads da la SanaSurselva ch’i dovra decisiuns, e che quellas decisiuns vegnan a far mal. La pli gronda schanza ch’il nov president porscha è ch'el è in interprendider, independent ella regiun e cunzunt ch'el ha nagins lioms politics.
La dumonda che resta è: Basta quai per sa metter atras tar ils medis e politichers – malgrà tut ils interess particulars?«
Reto Pfister, Producent Surselva
Sco possessuras da l’ospital stattan las vischnancas davant grevas decisiun, pia decider sch'ellas duain serrar u reducir tschertas partiziuns. Per René Epp èsi cler: Ils delegads han da decider davart las purschidas futuras da l’ospital. A la fin stoppia dentant la radunanza da delegadas e delegads decider, sch'ella vul suttametter la fatschenta a la populaziun.