Oriundamain avess l'ospizi a Tenna vulì cumenzar l'october cun il manaschi. Corona e retardaments tar las lubientschas da bajegiar entardan dentant l'avertura per intgins mais.
Nagin sustegn dal maun public
Tenor las normas vertentas avess la chasa stuì porscher plaz a 20 persunas per pudair far diever da sustegn finanzial dal maun public. En l'ospizi a Tenna pon set cussadents prender dimora. La finanziaziun è vegnida organisada sur donaziuns da privats e d’instituziuns. Dals custs totals da 3,8 milliuns francs mancan il mument anc 200'000 francs per cuvrir ils custs.
Cuminanza d'abitar
Finamira da l'ospizi è da pudair porscher a la populaziun in lieu en la Val Stussavgia per il temp a la fin da la vita cura ch'i n’è betg pli pussaivel da star a chasa. L’organisaziun è autra ch’en ina chasa da vegls classica. Uschia pon confamigliars e voluntaris surpigliar l'accumpagnament. Las prestaziuns da tgira fa la Spitex e la tgira medicinala il medi da chasa. Cun quai sistem duai la dimora en l'ospizi a Tenna esser accessibla era finanzialmain a l’entira populaziun da la val.