Surselva - Osterwalder maina cussegl d'administraziun da Surselva Turissem
Surselva Turissem ha elegì in nov president dal cussegl d’administraziun. Simon Osterwalder succeda a partir dal prim da schaner a Marcus Caduff ch’è vegnì elegì en la regenza.
Simon Osterwalder è advocat è partenari da la chanzlia d’advocat Bratschi ch’ha 200 collavuraturs. Per l’emprima giada ha il cussegl d’administraziun da Surselva Turissem elegì ina persuna segund-indigena per quest post. El saja losch da dastgar surprender quest uffizi, vegn Osterwalder cità en la communicaziun da Surselva Turissem:
Jau sun losch da dastgar far quest pass extraordinari sco «Unterländer» ensemen cun ils acziunaris, il cussegl d'administraziun e collavuraturas e collavuraturs.
Sut la batgetta da Simon Osterwalder vul la regiun Surselva sa posiziunar sco regiun da lavur e recreaziun multifara. Tenor atgnas indicaziuns saja quai da valitar sco signal per in dialog sur ils cunfins da singulas vals e gruppas d'interess.
Simon Osterwalder e la Surselva
Avrir la boxSerrar la box
L'advocat ed anteriur giugadur professiunal da ballamaun Simon Osterwalder è maridà, ha 3 uffants ed abita a Thalwil al lai da Turitg. Dapi passa 15 onns passentia el però ses temp liber en la Surselva. Il 2015 han el e sia dunna cumprà in pitschen hotel a Morissen che vegn actualmain renovà.
