Siglir tar il cuntegn

Header

cuntegn

Ovra fotovoltaica «Desertasol» Il dretg da construcziun è scadì – co vai vinavant?

L’ovra fotovoltaica «Desertasol» è vegnida realisada avant var 30 onns. Da quel temp era quai ina da las emprimas ovras fotovoltaicas en il Grischun. Per la vischnanca sa tschenta uss la dumonda, sch’ella duai renovar il dretg da construcziun u betg.

Avant 30 onns eran ovras fotovoltaicas anc raras. La construcziun da l’ovra «Desertasol» valeva sco ovra da piunier e sco project exemplaric. Dapi lura è passà bler temp e l’ovra fotovoltaica è ida in zic en emblidanza. Per la societad Repower che maina l’ovra fotovoltaica, è il dretg da construcziun scadì. Uss pudess la vischnanca sezza manar vinavant questa ovra solara. E quellas ponderaziuns fetschian ins il mument, uschia il president communal René Epp. Els stoppian dentant en in emprim pass savair quants custs che quai muntass per la vischnanca, era per la renovaziun da l’ovra. Els hajan dentant er l'idea da metter sin plirs bajetgs communals indrizs fotovoltaics. Perquai fiss ina ovra sco Desertasol anc attractiva, uschia Epp.

audio
Mustér: Co vinavant cun l'ovra solara Desertasol?
aus Actualitad vom 22.03.2022.
abspielen. Laufzeit 2 minutas 33 Sekunden.

Repower manass gugent vinavant l’ovra

Tenor la Repower datti actualmain quatter opziuns: Ina è che la vischnanca prolunghescha il dretg da construcziun. In’autra è che las pendicularas cumprassan quest ovra – cunquai ch'ella sa chatta en il territori da skis. Ina terza opziun saja che la vischnanca surpiglia en futur il manaschi. E la quarta varianta saja, da bajegiar enavos l’entira ovra fotovoltaica.

L’ovra fotovoltaica «Desertasol»
Legenda: La construcziun da l’ovra «Desertasol» valeva sco ovra da piunier. MAD

Sco la Repower ha confermà, manassan els gugent vinavant l’ovra. Lura duvrassi dentant investiziuns. Surtut ils panels solars sez ed era ils alternaturs stuessan vegnir remplazzads perquai ch’els èn 30 onns vegls. Ina autra spezialitad da questa ovra è ch’ella sa chatta sin terren liber. Per ina tala ovra na survegnissan ins betg pli ina lubientscha, uschia Stefan Bisculm da la Repower. Ma stuair dismetter l’entira ovra, cura che tuts discurran d’energias alternativas e cunzunt d’energia solara, na vegniss betg en dumonda – u fiss almain grev da giustifitgar, uschia Bisculm.

Las contractivas vegnian manadas il mument, uschia ch’els possian anc ils proxims mais decider en chaussa, uschia il president communal René Epp.

video
Ord l'archiv: Occurrenza d'avertura da l'ovra «Desertasol»
Or da Telesguard dals 04.09.1993.
abspielen. Laufzeit 4 minutas 8 Sekunden.

RTR actualitad 12:00

Artitgels legids il pli savens

Scrollar a sanestra Scrollar a dretga