La regenza ha concedì a las Ovras electricas Glion SA (OEG) la permissiun per derschentar il lai da fermada da Pigniu. La derschentada dastga vegnir fatga a partir dals 15 da matg fin e cun ils 30 da settember 2024. Sche la realisaziun na duess betg esser pussaivla l'onn 2024, po quella vegnir spustada fin il pli tard l'onn 2028 ed era vegnir fatga tranter ils 15 da matg ed ils 30 da settember da l'onn respectiv.
Dapi ch'il lai da fermada è vegnì mess en funcziun l'onn 1992, èn s'accumulads en il lai var 169'000 meters cubics sediments che restrenschan il manaschi da l'ovra. La derschentada è gia vegnida permessa l'onn 2021 cun ina limita temporala da trais onns. Ils ultims trais onns n'ha quella dentant betg pudì vegnir realisada, perquai che las cundiziuns generalas per la derschentada (idrologia e livel da l'aua) n'èn betg vegnidas cuntanschidas durant quests trais onns. Perquai ch'il termin da trais onns per realisar la derschentada è scrudà, han las OEG inoltrà ina nova dumonda per far in'unica derschentada dal lai da fermada da Pigniu. Per augmentar la probabilitad ch'ina derschentada possia vegnir realisada, è vegnì reelavurà il concept da derschentar.
Or da l'archiv:
