Cumenzà ha quai avant passa 40 onns cun visitar ina pitschna exposiziun d’ovs en il «Solothurner Gäu». Lura ha Annemarie Schrade cumprà l’emprim ov. In ov gravà, sco quai ch’igl è tradiziun en quella regiun. Dapi lura ha la dunna pensiunada rimnà da quai da 1'800 ovs da tut las sorts pussaivlas e nunpussaivlas.
Cumprar na cumpria ella betg mintga ov. I stoppia esser in exemplar ch’ella n’haja anc betg, u che cumpletteschia serias ch’ella haja. Ella saja fascinada, quantas metodas da decorar ovs ch’i dettia, raquinta la dunna ch’abitescha cun ses um ad Engelburg en il chantun Son Gagl.
Dumbrà n’hai jau mai propi els.
Pir cun la chasa da vacanzas – ch’els hajan cumprà avant intgins onns – saja quai stà pussaivel da metter tut ils ovs en vitrinas ed avair ina giada la survista. Propi dumbrà n’haja ella dentant anc mai ils ovs.
Entant crescha la collecziun vinavant. Annemarie Schrade na rimna però betg mo sezza ovs, sch’ella vesa tals che plaschan. Era enconuschents che san ch’ella rimna ovs, portan adina puspè ovs. Per part era da pajais lontans, nua ch’ella sezza è anc mai stada.
TR Telesguard 17:40
