Siglir tar il cuntegn
Inhalt

Surselva Pader Silvio Deragisch è mort

Suenter ina greva malsogna saja il pader Silvio Deragisch mort dumengia da Pasca sin la staziun da tgira en la claustra da chaputschins a Schwyz.

Purtret da Silvio Deragisch.
Legenda: Per persunas impedidas è el s'engaschà l'entschatta senza lubientscha. RTR, Prisca Bigliel

Frar Silvio Deragisch sco quai ch'el vegniva numnà il pli gugent, è stà enconuschent sco spiritual extrovertì, revoluzer ed original. In um che s'engaschava per carstgauns a l'ur da la societad. In um extrovertì che n'è betg stà il pader classic, mabain in zic auter en sia moda e maniera co el ha vivì.

En servetsch per carstgauns cun impediment

Dal 1977 enfin il 1979 ha pader Silvio Deragisch fat la scolaziun da pedagogia curativa a Turitg. Ad el èn gia lura ils carstgauns cun impediment stads fitg per cor. Diesch onns è el s'engaschà en la pastoraziun da carstgauns cun impediments spiertals e surds el chantun Turitg. Lura turna el en il chantun Grischun. Qua ha el surprendì la pastoraziun dals cussadents da la Fundaziun Scalottas ed è segidà en la plaiv da Tavau. Pli tard ha el era entschet a s'engaschar en differentas chasas d'impedids a Cuira e conturn.

L'onn 1991 surpiglia el trais plaivs en Tumleastga. El va a star en la chasa-pravenda a Tumegl. Ma dasper questa lavur n'emblida el betg ils impedids. El percorscha bainbaud ch'i na dat nagina cuminanza religius per ils concartents cun impediments.

Il 1992 funda el ensemen cun Claire e Peter Reinhard la «Khurerketti». Ella duai porscher a carstgauns cun impediments da Cuera e conturn la pussaivladad da festivar ensemen cun na betg impedir l’ecumena, en la quala il chau, ils mauns ed il cor duain esser el center. Durant las sentupadas cun valurs cristianas dueva mintga carstgaun vegnir acceptà seriusamain en sia atgnadad. Durant 25 onns è la «Khurerketti» stada en funcziun.