Siglir tar il cuntegn

Header

cuntegn

Surselva Panorama da Flem da Giacometti - sparì per plirs decennis

La istorgia da quest maletg entschaiva l'onn 1903. Giovanni Giacometti survegn l’incumbensa dal directur J.F. Walther – Denz da malegiar il panorama da Flem.

Il maletg finì il 1904 è vegnì pendì si l'emprim el pavigliun “Cafébillard”. Paucs onns pli tard è el vegnì allontanà, mess si surchombras... ed ì en emblidanza.

Cun quai che Giovanni Giacometti n'era anc betg in pictur renumà, nagin che ha fatg stim da quai. Plirs decennis è il maletg stà emblidà.

Qua vegn Josef Müller l'onn 1986, sco nov directur dal hotel Waldhaus, cun l’idea da realisar in museum dal hotel. El va perquai sin la tschertga da stgazis en ils tschalers ed en ils surchombras.

Josef Müller sesa vit maisa e contempla ina documentaziun dal "Panorama da Flem"
Legenda: Il chattader Josef Müller n’ha mai survegnì ina recumpensaziun. RTR,L. Livers

Dis ed emnas haja el tschertgà en l'entir hotel Waldhaus e tuttenina in di haja el chattà si surchombras dal pavigliun, davos ina ventilaziun il maletg, ubain meglier detg ils trais maletgs da Giovanni Giacometti.

Sco in da sis el lotto

La surpraisa è stada perfetga. La casualitad ha vulì, che gest quai di seseva il commerziant d’art Reto a Marca el café, e Josef Müller ha mussà ad el ils maletgs. Il commerziant ha immediat fatg ina offerta e vulì pajar 200’000 francs bar sin maisa. Ina summa che ha fatg surstar in pau.

Josef Müller decida da reponderar e surtut da sclerir quai cun il cussegl d’administraziun dal hotel Waldhaus. Da betg vender il maletg saja stà l’emprima e la dretga reacziun. La valitaziun fatga curt suenter ha mussà, ch'il maletg vala bler dapli. In giast dal hotel Waldhaus, che lavurava tar la chasa d’aucziun Christie’s, ha valità il triptychon sin dus milliuns francs.

audio
Waldhaus Flem - Jo Müller raquenta
ord RTR Audio dals 22.03.2016.
laschar ir. Durada: 4 minutas 11 Secundas.

Oz, pia anc ina giada 30 onns pli tard, vegn el valità sin dus enfin trais milliuns francs.

La vendita

Il triptychon "panorama da Flem", in maletg da Giovanni Giacometti en trais parts, duai vegnir vendì. Il “panorama da Flem” tutga tar l’inventar dal hotel Waldhaus ch’è vegnì cumprà il december 2015 da la firma americana Z Capital Partners.

Artitgels legids il pli savens