Siglir tar il cuntegn

Header

cuntegn

Surselva Parc Adula è periclità

Uniun Parc Adula n’è betg cuntenta cun la posiziun da la Confederaziun e vul discurs cun Doris Leuthard.

I na possia betg esser che la Confederaziun mettia ussa, var 6 mais avant la votaziun davart il parc, en privel il project cun prescripziuns supplementaras, di Peter Binz, commember da la cumissiun da direcziun da l’Uniun Parc Adula. Quai suenter ch’ins haja elavurà las cundiziuns per il parc cun tut ils acturs e chattà cumpromiss che chattian l’accordanza tar ina maioritad dal pievel. La finala decidia il pievel davart il parc.

audio
Saira: Parc Adula betg cuntent cun posiziun da Confederaziun
ord Actualitad dals 06.05.2016.
laschar ir. Durada: 3 minutas 11 Secundas.

Tenor Peter Binz avess la Confederaziun gia pudì reagir pli baud e vegnir cun questas pretensiuns. Da vart dal Parc Adula hajan ins adina infurmà davart il project. «Tar la zona circumdanta han ins adina ditg davart dal chantun ch’i na dovria naginas pretensiuns. Ussa pretenda la Confederaziun ch’i dovria mesiras da planisaziun dal territori en questa zona», declera Peter Binz.

Parc Adula sin ballantscha

Uschè gronda na po quella surpraisa dentant betg esser. L’ordinaziun da parcs federals è dapi l'onn 2007 en vigur. Dapi lura savevan ils iniziants dal Parc Adula ch'i dettia restricziuns era en la zona circumdanta. Ed els savevan che la zona da coc na po betg vertir cumpromiss. Tenor il correspundent da la Surselva, Linus Livers, possian ins propi dir ch’ils organisaturs dal parc èn ids en quai project cun egls blaus ed han pensà che tut las excepziuns vegnian acceptadas da la Confederaziun.

audio
Mezdi: Parc Adula - En las prescripziuns da la Confederaziun il culp mortal?
ord Actualitad dals 09.05.2016.
laschar ir. Durada: 5 minutas 27 Secundas.

Da sut ensi duai il parc vegnir organisà, mo lura vegn el era acceptà. Quai era la devisa dals organisaturs, uschia Peter Binz da la cumissiun da direcziun Parc Adula. Dentant tenor il sboz da l’Uffizi federal per l’ambient sto era il Parc Adula ademplir las ordinaziuns da parc vertentas dapi l’onn 2007. Quai munta che cumpromiss ed empermischuns fatgas dals iniziants dal Parc Adula na valan betg per tut pretsch. Il svilup sco el sa preschenta ussa è aua sin ils mulins dals adversaris dal parc.

Be examinaziun preliminara

Tenor la pledadra da medias da l’Uffizi federal per l’ambient, Barbora Neversil, saja questa posiziun be in pass tranteren - ina sort examinaziun preliminara dal sboz da la charta. Ins guardia, schebain ils criteris sajan ademplids ch’i dovra per che la Confederaziun possia dar daners, ha Barbora Neversil declerà vinavant. La posiziun definitiva e la decisiun dettia quai da la Confederaziun pir suenter che la charta definitiva saja inoltrada tar l’Uffizi per l’ambient.

Actualmain èn ins londervi da preparar la versiun definitiva, quai cun resguardar uschè lunsch sco pussaivel las propostas ed ils giavischs ch’èn vegnids inoltrads suenter la consultaziun publica da la charta.

La votaziun en las 17 vischnancas è planisada per ils 27 da november 2016.

RR Actualitad mezdi 11:00

Artitgels legids il pli savens