Siglir tar il cuntegn

Header

250 persunas en stadas a questa orientaziun.
Legenda: 250 persunas en stadas a questa orientaziun. RTR, LINUS LIVERS
cuntegn

Surselva Parc Adula: Val tema per ils plans turistics

La tur gigantica, il parc da Tadao Ando, la cumplettaziun da las pendicularas ed il project d'ennavar, en stads en il focus da las dumondas.

«Las uniuns per l'ambient survegnan memia blera pussanza entras il Parc Adula». Questa opiniun n'èn ils promoturs dal Parc Adula betg vegnids da bandischar ord ils chaus dals da Val. Las dumondas han quasi adina gì da far insatge cun ils projects turistics.

Era Res Cabalzar e Remo Fehr da l'uffizi per natira ed ambient n'èn betg vegnids da persvader. Ils arguments che las uniuns per l'ambient sco WWF e pro Natura na survegnian betg dapli pussanza sche Val S. Pieder saja ina part dal parc, n'han betg persvadì.

Procuran las uniuns per l'ambient per in Na?

Malgrà ch'il recurs da la Pro Natura cunter il project d'ennavar en Val S. Pieder ha da far nagut cun il Parc Adula, è quel vegnì duvrà sco exempel che mussia la pussanza da las uniuns per l'ambient.

La preschentaziun dals promoturs dal Parc Adula è stada cumplessiva. La part cun las dumondas è vegnida moderada senza grondas emoziuns.

Las parolas n'èn anc betg sin maisa

Davart dals turistichers è stà d’udir, che l'uniun turistica «VisitVals» ponderescha da dar ora ina parola co votar. Moritz Schmid il president da VisitVals ha manegià, ch'el na tradeschia anc betg tge parola che quai vegn ad esser. La 7132 SA ha manegià vers RTR ch'els na commenteschian betg quests fatgs.

La finala ha Robert Berni il president da las pendicularas da Val S. Pieder manegià, ch'els na recumondian betg co votar ils 27 da november, ils acziunaris sajan dentant vegnids avertids che la cumplettaziun da las pendicularas ed ils plans per in resort sajan periclitads cun il parc. Plinavant ha el fatg valair il recurs encunter il project d'ennavar sco la situaziun che pudessi daventar la regla sche Val daventia part dal parc.

RR actualitad 07:00

Artitgels legids il pli savens

Scrollar a sanestra Scrollar a dretga