Ils 27 da november èsi usche lunsch,16 vischnancas e la fracziun Vrin da la vischnanca Lumnezia voteschan sur dal Parc Adula.
Per quella votaziun èsi da decider sur da 4 dumondas:
- Vulais vus acceptar il parc naziunal per ina fasa da manaschi da 10 onns (2018-2027)?
- Vulais vus entrar en l’uniun Parc Adula?
- Vulais vus acceptar ils statuts da questa uniun?
- Vulais vus acceptar la revisiun parziala da la planisaziun locala (inclus il reglament da la zona da coc)?
Ils da Vrin pon segir decider sco sulets, sur dal «gea» u il «na» per la fasa da manaschi da 10 onns dal Parc Adula. Quai vegn garantì al vischinadi da Vrin entras il contract da fusiun da la vischnanca Lumnezia.
Tgi che ha da decider davart las dumondas «entrar en l’uniun Parc Adula» ed «acceptar il statut da questa uniun» n'è anc betg sclerì. Sco quai che Duri Blumnethal il president da vischnanca da la Lumnezia ha ditg ad RTR haja el intervegnì pir dacurt che questas duas dumondas sajan era da respunder ils 27 da november. Questas duas dumondas fatschentan il mument era Georg Aliesch dal Uffizi da vischnanca dal Grischun. La soluziun tgi che decidia la finala questa dumonda Vrin u la Lumnezia entira na saja anc betg cler.
ulteriurs artechels
Cler è che la dumonda da la revisiun parziala da la planisaziun locala è chaussa da l’entira vischnanca, e questa dumonda vegn decidida pir suenter che Vrin ha votà. En cas che Vrin di «na» al Parc Adula daventa questa votaziun dentant obsoleta.