La regiun enturn igl Um Su, Sezner e Grenerberg è ina regiun che è gia conquistada dal turissem ed ella vischinanza dat i pendicularas. Medemamain ademplescha il Parc da Vent Surselva in criteri che il chantun giavischia explicitamain: I duai dar entirs parcs da vent e betg mo qua e là singulas rodas da vent.
Co vinavant cun il Parc da Vent Surselva
Il Parc da Vent Surselva para dad esser en ina situaziun plitost mal dada. Dapi che l’Ovra electrica da Turitg (EWZ) sa è retratga da quai project na audan ins betg bler pli dal Parc da Vent Surselva. Igl uffizi da planisaziun dal terren ha perquai clamà ensemen cun la firma Altanventa SA ad ina maisa radunda. A questa maisa radunda ha la Altaventa SA preschentà il nov stan dal project. «En curt vegn era la populaziun a vegnir orientada» ha Andy Imfeld, il maina fatschenta da la Altaventa SA, detg a RTR.
Preschentas eran las suprastanzas da las vischnancas da la Lumnezia, da Sursaissa e da Glion sco er differentas organisaziun per igl ambient. Sco quai che Martin Jaeger il president da la gruppa d'interess IG Sez Ner-Um Su-Grenerberg ha detg, saja i sta ina buna discussiun. Els na hajan dentant betg midà lur tenuta e vegnian vinavant a cumbatter il Parc da Vent Surselva.
Tschertgà vegnan novs investiders
Per la Altaventa SA dat i ussa ina chaussa che fa la pli gronda prescha, numnadamain chattar in nov investider che surpiglia la rolla da l’Ovra electrica da Turitg, che sa è retratga da quai project el decurs da la stad passada. Sco quai che Andy Imfeld ha tradì, dettia plirs interessents era dal Grischun.