Ina pretensiun da la vischnanca da Flem sco era da las Pendicularas Flem Laax Falera en connex cun la surbajegiada Stenna Center è, che durant l’entir temp da construcziun stettian a disposiziun almain 500 parcadis a Flem. Enfin uss sa chattavan quels parcadis en la veglia chasa da parcar Stenna. Il plan da construcziun dal nov center da cumpra prevesa dentant, che quella chasa da parcar vegn spazzada proxima primavaira.
70 parcadis sper chasa communala
Quels parcadis ston pia vegnir remplazzads. Tenor il mainaproject Peter Heuscher vegnan perquai realisads duas plazzas da parcar temporaras a Flem durant la stad 2017. Ina plazza cun 71 parcadis gist sper la chasa communala ed ina plazza era cun 71 parcadis sin la Ballonwiese. Ultra da quai stat era il parcadi e transport Vallorca a disposiziun en cas da necessitad. Quella plazza da parcar vegn gia duvrada durant la stagiun d’enviern e sa chatta a l'ur da Flem en direcziun da Cuira.
Stagiun d’enviern 2017/18 cun nova chasa da parcar
Durant la stad vegn la veglia chasa da parcar spazzada ed il nov cumplex cun bunamain 1’300 parcadis sin pliras auzadas construì. Ina part da quels parcadis duai vegnir averts vers la fin dal 2017, segir anc avant la stagiun d’enviern 2017/18. Lura stettian puspè ils 500 parcadis a disposiziun en la nova chasa da parcar dal center Stenna e las plazzas da parcar temporaras pon vegnir serradas.
RR actualitad 17:00