Siglir tar il cuntegn

Header

audio
Tujetsch: concessiun per la Casa Depuoz
Or da Actualitad dals 11.08.2022.
laschar ir. Durada: 3 minutas 30 Secundas.
cuntegn

Parlament Tujetsch Glisch verda per chasa per persunas cun impediment a Sedrun

A Sedrun duai dar ina nova chasa per 12 persunas creschidas cun impediment. Quella remplazzass la «Casa Soldanella» a Rueras. L'Uniun Casa Depuoz quinta cun custs da 6,5 milliuns francs.

A Sedrun duai dar ina nova chasa per 12 persunas creschidas cun impediment. Il parlament da la vischnanca da Tujetsch ha concedì mesemna saja latiers il dretg da construcziun a l'uniun Casa Depuoz. Il nov bajetg vegn construì a Sedrun. Pli precis: Sin l'areal da l'anteriura chasa d'attempads «S. Vigeli».

Quest lieu è ideal amez la vischnanca, datiers dals meds da transport publics e da l’infrastructura dal vitg.
Autur: Martin Cavegn President communal Tujetsch

L'anteriura chasa d'attempads vegn spazzada sin cust da la vischnanca. Quant che quai custa, vegnia calculà il mument, uschia il president communal Martin Cavegn. La finamira saja da mantegnair en la val las circa 13 plazzas da lavur ed era da porscher in bun lieu per las persunas cun in impediment. E quest lieu ideal saja amez la vischnanca, datiers dals meds da transport publics e da l’infrastructura dal vitg.

Da Rueras a Sedrun

La nova dimora per persunas cun in impediment a Sedrun, remplazzass la purschida a Rueras, la «Casa Soldanella». L'Uniun Casa Depuoz quinta cun custs da 6,5 milliuns francs. Las lavurs da construcziun cumenzan - sche tut va tenor plan - l'onn 2024, tenor contract ston quellas cumenzar il 2025. Las cussedentas ed ils cussedents duai retrair lur nov da chasa 2025.

Biro d’architectura da Haldenstein

Realisar e planisar il project vegn il biro Albertin a Haldenstein, ha ditg Manfred Manser da la suprastanza da l’uniun Casa Depuoz. Lezza proposta haja persvas il meglier ed il bajetg planisà vegnia realisà en lain. Uss stoppian els spetgar sin la decisiun dal chantun, sche lez possia sustegnair il project. Quella duai vegnir il settember. Maximalmain po il chantun sustegnair tals projects cun 80% dals custs, en quest cas vegn calculà cun custs da 6,5 milliuns francs.

RTR novitads 06:00

Artitgels legids il pli savens