La Distec è la gronda firma d’industria en Surselva; e perquai saja ella fitg impurtanta per la regiun, di Parolini. I saja ina nischa sper l’agricultura, la selvicultura ed il turissem. La strategia dal chantun saja da guardar che la populaziun possia viver en las regiuns e che na tut las firmas sa concentreschian en la regiun da Cuera e conturn.
Impurtanta per Mustér
Era per il president da la vischnanca da Mustér Francestg Cajacob saja questa veglia fatschenta ina pitga economica impurtanta, perquai ch’ins possia scolar professiuns spezialas ed era 18 emprendists.
Lung viadi per emprendists
Il directur da la Distec Loris Marsura ha menziunà che la firma haja da sbatter cun tscherts problems, surtut cun la concurrenza en l’Europa da l’ost ed en l’Asia. Vitiers vegnia il ferm franc svizzer e las distanzas tar ils centers. El di ch’els hajan ina gronda partiziun da scolaziun per emprendists e ch’il chantun na sustegnia betg els en quest reguard. In problem è ch’ils emprendists hajan savens in lung viadi per ir a la scolaziun.
Il chantun na possia dentant betg midar la topografia, ins possia sin il pli optimar punctualmain las colliaziuns dal traffic public. Quai che pertutgia las finanzas saja quai chaussa dal departament d’educaziun, di Jon Domenic Parolini.