Mathilda Derungs è vi da preparar la decoraziun da fluras per la baselgia catolica a Glion. Sin Pasca notg duai quella puspè splendurar. En tuns verd, alv e mellen ornescha ella in matg suenter l'auter. Era las cuvertas ston puspè vegnir en lur lieu. En il medem temp po il caluster Alois Carisch mussar las sgaras en il clutger da la baselgia. Blers taiss stgalims mainan en il clutger, ils zenns na dastgan betg tutgar enfin la levada, els èn ids a Roma, uschia la tradiziun.
Dapi che el e sia dunna Mathilda Derungs han surpiglià la lavur da calusters, han els puspè introducì l'usit da las sgaras. Uschia vegn sgarà enstagl da tutgar ils zenns per far attent sin la messa da Pasca notg.
Blers han gì grond plaschair che nus avain puspè introducì quest usit a Glion.
Alois Carisch n'avess mai ponderà da daventar ina giada caluster. Quai saja sa dà, dentant la lavur plascha fitg ad el ed a sia dunna.
Per il fieu da Pasca ha la giuventetgna procurà. En il curtin da la baselgia han els fatg il fieu per arder las chandailas da Pasca. Ils parochians e las parochianas s'inscuntran en il curtin per arder las chandailas e lura ir ensemen en la baselgia stgira per la messa da Pasca notg, la messa la pli impurtanta en l'onn liturgic.
-
Bild 1 von 5. En il clutger da la baselgia da Glion. Alois Carisch ha puspè introducì l'usit da las sgaras. Decennis n'è betg pli vegnì sgarà en questa baselgia. Bildquelle: RTR.
-
Bild 2 von 5. Mathilda Derungs vi da preperar las fluras. La decoraziun da fluras è la lavur che ella fa il pli gugent. Bildquelle: RTR.
-
Bild 3 von 5. Era «pitgar ovs» tutga tar la tradiziun da Pasca. Mathilda Derungs ed Alois Carisch han era fatg part a quest usit en chasa parvenda. Bildquelle: RTR.
-
Bild 4 von 5. Era Sur Alfred Cavelti dat anc in sguard avant la messa. Per la messa da Pasca vegn la baselgia puspè ornada e decorada. Bildquelle: RTR.
-
Bild 5 von 5. L'aua vegn benedida. Sur Alfred Cavelti durant la messa da Pasca notg a Glion. Bildquelle: RTR.