Quest onn ha il musicist e chantadur da reggea Dodo dà in concert. Ma betg persul, mabain cun tut ils scolars e las scolaras da la scola da Sedrun. Pitschen e grond han trenà mais a la lunga ils hits da Dodo.
La magistra da musica Naomi Deplazes ha ditg envers RTR: «La sfida la pli gronda oravant tut per ils pitschens è stada d’emprender ils texts per tudestg svizzer». Ma els hajan trenà bler, durant las lecziuns da musica ed ina giada era ensemen cun Dodo. I saja stà in project che haja collià ils scolars e las scolaras da tut las fracziuns, din ils responsabels da la scola.
Plaischair tar Dodo, scolaras e visitaders
Il Turitgais Dodo era be fieu e flomma suenter il concert. D’esser sin il palc cun in chor da 100 uffants saja stà grondius.
Il chor ch'è stà cun mai sin il palc m’ha dà gronda energia. E da pudair far questa show cun ils uffants en questa culissa grondiusa è stà genial.
Plaschair han era ils visitaders e las visitadras, mammas, babs, tattas, nons ed ondas gì ch’han ballà e chantà la dumengia suentermezdi hits sco «Hippiebus», «Ballade für Annamerie» u «Zürimaa» sin il Pass Alpsu.