Dumengia ils 15 da zercladur vegn il pass Lucmagn per l’emprima giada serrà per il traffic motorisà – quai per quatter uras. Instradà questa acziun han las organisaziuns turisticas Grischun Vacanzas, Sedrun-Mustér Turissem, Bellinzona e Valli Turismo sco era Pro Velo Grischun. Sulet velos e peduns pon traversar durant quest temp il pass. L'idea saja d'uschia promover il ciclissem.
Acziun per traffic plaun cun lunga tradiziun
Il pass d'Alvra vegn gia serrà per la 18avla giada per il traffic motorisà. Ils velocipedist e las velocipedistas paran da stimar fitg questa offerta: Radund 7'000 persunas sa participeschan cun lur velo e giaudan l'atmosfera speziala. Sco la directura da Sedrun-Mustér Turissem Nicole Weber di, quintan ins cun radund 500 participantas e participants da mintga vart dal pass Lucmagn. Ella recumonda da s’annunziar per l’occurrenza, era sch'ina annunzia n’è betg obligatorica. I saja era pussaivel da vegnir spontan. Per l’organisaziun fissi dentant bun da savair, quantas persunas che vegnan circa.
La convivenza sur il pass sco finamira
Ina da las finamiras da l’occurrenza saja da colliar meglier las regiuns da mintga vart dals pass ina cun l'autra – en il cas concret dal pass Lucmagn pia la Val dal Blegn cun la Surselva. Era la Pro Lucmagn sustegn questa finamira. Perquai sa participescha l’uniun vi da l’organisaziun da quest acziun.
Per nus èsi impurtant da laschar avert la via sur il pass durant la stagiun d’enviern. Ma da l’autra vart era da colliar las duas valladas.
Traffic public enstagl da l'auto
Ina da las sfidas è la dumonda, co vegnir al lieu cun tut ils velos e las persunas. Perquai datti bus spezials che transportan gratuit ils velos da Mustér fin a Fuorns, en la Val Medel. Il plaz da parcar a Fuorns è limità. Perquai recumonda Nicole Weber da Sedrun-Mustér Turissem d'enstagl vegnir cun il traffic public. Uschia possian ins giudair l’entir di senza stuair prender l’auto, declara Nicole Weber vinavant.
I saja era pussaivel d’affittar per quest di in velo per in pretsch reducì. Uschia possian era persunas che na possedan betg in velo giudair l’avertura al pass Lucmagn. I saja er impurtant da vegnir cun ils meds publics per evitar in chaos da traffic a Fuorns.
Pro Velo Grischun vul anc dapli pass
Surtut la Pro Velo Grischun vul ch'anc dapli pass en il Grischun vegnan serrads per il traffic motorisà – u meglier ditg – averts per il traffic plaun. Tenor Simon Wahl, il mainafatschenta da Pro Velo Grischun, saja l’idea da porscher a tut las velocipedistas ed ils velocipedists la pussaivladad da giudair la via sur il pass senza squitsch da traffic.
Era l’aspect turistic saja da resguardar. Sche bleras persunas nizzegian la purschida, lura fissi er imaginabel da serrar la via dal pass durant plirs dis per il traffic motorisà, di Simon Wahl. L'acziun da pass liber vegnia era cuntinuada l'onn proxim, sche quella vegn appreziada.