Pli baud fascheva Paul Tschuor il pur. Durant la stagiun d'enviern aveva el – sco blers auters era – in segund job. Suenter ch'el è ì intgins envierns a lavurar en il guaud, ha el cumenzà cun 30 onns a lavurar tar las pendicularas – concret tar il runal d'entschaviders a Laax Murschetg. D'avair prendì questa decisiun na s'enricla Paul Tschuor betg. Cuntrari, i saja stà il meglier ch'el haja pudì far.
Durant tut ils onns ha Paul Tschuor cunzunt stimà d'esser en contact cun la glieud. Per exempel saja bel da vesair, co la segunda generaziun emprenda d'ir cun skis. Mammas ch'avevan sezzas emprendì d'ir cun il runal tar Paul Tschuor, portian uss lur uffants. Ed igl è gist il contact cun la glieud che motivescha Paul Tschuor da Rueun da lavurar – anc cun 72 onns.
Quest enviern sa gida Paul Tschuor durant las emnas ch'i gira bler al runal d'uffants. Tut en tut sa tractia da radund sis emnas. Sch'el na saja betg denturn, tut che dumondia, nua ch'el saja, tradescha Gion Beeli ch'è dapi prest 40 onns ses collega da lavur. Uschia manegia il collega da lavur cun in surrir: «Paul è ina instituziun!».
Per propi guarda Paul Tschuor dal runal d'uffants. Per ch'i saja pli simpel per ils uffants da tschappar il giuf, adattescha el il tempo dal runal, sche necessari. En pli dat el tips als uffants, co tschappar il giuf. Ma suenter tants onns sin la pista dals entschaviders gidia el er mintgatant ad in uffant d'ir emprimas stortas cun skis.
Cura fissi lura temp da chalar? Questa dumonda na po l'um da 72 onns betg respunder. Cura ch'el na possia betg pli, saja da chalar. Enfin ch'i fetschia plaschair, sa gidia el. Be far nagut ed avair lungurus na veglia el betg.
Muntada dal persunal pensiunà
Cunzunt tar las sutgeras e gondlas ha l'Arena Alva engaschà persunal pensiunà. 15% da las radund 120 persunas che lavuran tar ils indrizs da transport èn gia en la vegliadetgna da pensiun, sco Senta Gautschi ha confermà envers RTR.
Senza il persunal pensiunà na vai betg. Il mument fissi fitg grev.
Il persunal pensiunà haja differents avantatgs per la fatschenta, sco Senta Gautschi explitgescha. D'in maun profiteschia il persunal pli giuven da l'experientscha dal persunal pli vegl. Da l'autra vart saja questa gruppa da persunal er zunt flexibla e possia uschia era siglir en, sche autras persunas vegnian malsaunas. Er lavurian blers be parzial, magari schizunt be per cuvrir il temp da pausa da mezdi.