Nadja Caminada e Sascha Dimmeler èn cuntents cun il pass d'avair surpiglià la pasternaria cun café. Per ella èsi stà in return suenter 17 onns, per el è il viver a Vrin insatge nov. Nadja Caminada lavurava gia avant sco vendidra e scheffa d'ina filiala da Coop a Winterthur e Sascha Dimmeler era accumpagnader social da giuvenils. Tuts dus n'èn pia betg pasterners da professiun, ma els han emprendì da far lur products en lur atgna pasternaria. D'ina vart han els survegnì ils recepts dal «peck» vegl e da l'autra han els diversifitgà la purschida cun novs products e novas ideas.
Sper il paun e las turtas da nuschs chattan ins uss era pastas e sosa da tomata ord atgna producziun. Plinavant ha la «Casa Leon» duas chombras da osps. Cun quai ch'il Hotel Piz Terri è serrà, datti mo paucas pussaivladads da pernottar a Vrin. Sascha Dimmeler che vegn nan d'ina professiun sociala, ha era gì l'idea da metter a disposiziun in plaz per in «Time Out». Uschia sa glieud che vul u sto bandunar per in tschert temp lur ambient usità chattar in lieu per quai a Vrin.
Per la glieud da Vrin era il café in lieu da cuminanza impurtant. Els van bler e gugent a baiver insatge – saja quai en il café u en l'ustaria. Quai schabegia er or da solidaritad, per ch'il café resta vinavant avert, manegia ina abitanta.
Il café munta per nus fitg bler. Uschia han ins occupaziun ed ins vesa la glieud.
