Siglir tar il cuntegn
Inhalt

Surselva Pauc interess per saira d'infurmaziun dal Musical Surselva

Sulet 6 giuvenils èn stads preschents a la saira d'infurmaziun per il musical «En 80 dis enturn il mund» a Glion. Il reschissur, Roland Körner, haja bain savì entusiasmar ils preschents. Enstagl dals dus castings previs datti uss mo in.

Purtret da Körner che gesticulescha ed ils 6 giuvenils interessads.
Legenda: Il reschissur Roland Körner ha preschentà il musical als preschents. ANR, Giusep Venzin

Il president da l'Uniun Musical Surselva, Daniel Blumenthal, saja bain stà trumpà dal pitschen dumber d'interessads. Tuttina haja el sa laschà entusiasmar dal reschissur Roland Körner. Cun Körner hajan ins segir la dretga persuna per il musical. A la saira d'infurmaziun hajan ins vis co ch'el haja pudì entusiasmar ils giuvenils per il project, citescha l'Agentura da novitads rumantscha Daniel Blumenthal.

L'Uniun Musical Surselva aveva previs dus castings, in sonda proxima, ils 13 d'october, ed in segund, dumengia ils 28 d'october. Perquai ch'i hajan gì uschè paucas annunzias per l'emprima data, fetschian els uss mo in casting a la segunda data, ha declerà Blumenthal. Plinavant saja Blumenthal da l'avis ch'i dovria anc dapli stentas per cuntanscher tut ils giuvenils interessads per il project. Tenor basegn sajan previs era ulteriurs castings.

RR novitads 07:00