Pendiculara Sedrun – Cuolm da Vi: Quasi l’entir project è preparà

Els sajan il mument en ina fasa fitg tecnica dal project, di il directur da las pendicularas da Mustér Rudolf Büchi. El è responsabel per il project. La stad passada hajan els tramess ils documents per la segirtad tecnica a l’uffizi federal da traffic.

Visualisaziun Culm da Vi. Bild in Lightbox öffnen.

Legenda da maletgs: Visualisaziun Culm da Vi. Keystone

Saira: Colliaziun Cuolm da Vi

2:16 min, Actualitad dals 10.11.2017

I saja il mument ina collavuraziun fitg stretga tranter inschigners, perquai che quasi mintg’emna vegnia barattà documents per cumplettar ubain precisar els. Fin uss hajan ils uffizis chantunals e federals reagì per gronda part positivamain sin il project. Era cun las organisaziuns per l’ambient sajan els sin buna via. Els stoppian mo anc sclerir intginas dumondas, co ins veglia nizzegiar il project la stad, di Rudolf Büchi.

Cumenzà 2012

Els hajan cumenzà cun il project l’atun 2012, di Büchi. La stad 2016 hajan els instradà la procedura coordinada cun plan directiv regiunal e chantunal, cun il plan d’utilisaziun e cun la procedura per approvar il plan tar l’uffizi federal da traffic. La finamira da cumenzar tut il medem mument saja stada dad esser pli spert.

Ier ha il chantun approvà la revisiun da la planisaziun locala da Tujetsch. Il proxim pass è ch’ils Tuatschins decidan da la finanziaziun e da dretgs da bajegiar e da passar cun conducts. Cura che questa decisiun vegn prendida n'è betg anc cler. E sch’il resultat è positiv po l’uffizi federal da traffic dar la concessiun, vul dir il dretg da bajegiar la pendiculara.

RR actualitad 17:00