La pendiculara da Tgom en il territori da Sedrun è daventada l'onn 2006 l'alternativa suenter ch'ins aveva spazzà la sutgera da Cungieri. Uss cun las novas purschidas da Cungieri ed il Schneehühnerstock na dovr'ins betg pli la pitschna pendiculara dal Tgom che vegniva anc duvrada sco purschida da stad, uschia Silvio Schmid, il manader da las pendicularas Andermatt Sedrun. Proxima fin d'emna vegn la cabina serrada.
Sustegn tras il maun public
Dapi il 2006 sustegn la vischnanca da Tujetsch il manaschi da la pendiculara cun daners dal maun public. Il davos en quai stads 70’000 francs ad onn per il manaschi da stad. Quels daners vegnan impundids a partir da l’auter onn per autras chaussas turisticas ha Beat Röschlin ditg ad RTR.
Quai n'è betg chaussa da la vischnanca, da forsa manar sezza la pendiculara da Tgom.
Ord vista economica betg pli attractiv
Ord vista da las pendicularas dad Andermatt Sedrun èsi adina stà cler che la pendiculara da Tgom vegn serrada ina giada che la colliaziun dad Andermatt a Sedrun è realisada. Cun las cabinas che mainan sin il Schneehühnerstock davent dal Pass Alpsu è quai uss il cas. A partir da l’auter onn è il Schneehühnerstock lura era avert la stad. Vitiers vegn anc che la nova cabina da Sedrun sin il Cuolm da Vi vegn medemamain averta l’auter onn per il turissem da stad.
Ins sto vesair che la purschida vegn pli gronda l’autra stad, malgrà ch'il Tgom vegn serrà.
RR actualitad 11:45