Siglir tar il cuntegn

Header

cuntegn

Surselva Pendicularas Breil Vuorz Andiast spetgan in onn deficitar

Malgrà in december miserabel quintan las pendicularas Breil Vuorz Andiast cun in meglier onn da gestiun che la stagiun passada. Cunzunt il favrer cun 20% dapli giasts è stà fitg positiv. Tuttina spetga il directur da las pendicularas Breil Vuorz Andiast cun ina sperdita la fin da l’onn.

Meglras pistas e menus pli favuraivels

Grazia a las bunas relaziuns da l’entschatta schaner, han las pistas pudì vegnir preparadas meglier ed era fatgas pli ladas. Tenor Beat Zenklusen, il directur da las pendicularas Breil Vuorz Andiast, haja era il sbassament dals pretschs en ils restaurants gidà da carmalar cunzunt dapli famiglias sin pista.

Beat Zenklusen en ina chamischa blaua davos in pult aut che lavura cun in laptop. Sin maisa ins vesa massa palpiri, dossiers, plans ed in func.
Legenda: Beat Zenklusen, il directur da las pendicularas Breil Vuorz Andiast, en ses biro a Breil. RTR, C. Albin

Sch'il mars na dat betg dal tuttafatg en l’aua, quinta Beat Zenklusen cun ina pli gronda svieuta cumpareglià cun l'onn passà.

Tuttina in deficit

Il resultat final 2014/15 vegnia ad esser meglier che la sperdita da bunamain 750’000.- en l'onn 2013/14. Dentant, era cun dapli svieuta, na vegnan las pendicularas betg a far in gudogn. L'onn passà hajan els stuì midar l’entira electronica d’ina sutgera, quai che haja chaschunà gronds custs. Quests custs vegnian repartids sin 3 onns.

Ressort da vacanzas Pradas - speranza per il futur

Il plazzal dal ressort da vacanzas Pradas entschatta favrer 2015. In di surtratg, las chasas han anc si punts ed ina cuverta da naiv giascha sin il plazzal.
Legenda: Il plazzal dal ressort da vacanzas Pradas entschatta favrer 2015. RTR, C. Albin

Gronda speranza metta Beat Zenklusen en il nov ressort da vacanzas Pradas che vegn avert entschatta december 2015. Entras ils giasts dal ressort quintan las pendicularas Breil Vuorz Andiast cun ina svieuta supplementara da radund 1 milliun francs il proxim enviern. Il directur è persvas, che uschia vegnan las pendicularas a far in gudogn a partir da l’enviern 2015.

Artitgels legids il pli savens