Siglir tar il cuntegn
Inhalt

Surselva Pendicularas Breil-Vuorz ed Andiast: Marcel Friberg sa retira

Sco successur da Marcel Friberg è proponì Markus Noser. En pli han las pendicularas communitgà ils resultats da l'onn da gestiun passà – «suenter in enviern cun blera naiv e malavita pauc sulegl».

Portrait.
Legenda: Marcel Friberg – el sa retira suenter 12 onns sco president dal cussegl d’administraziun. RTR, Linus Livers

Malgrà la situaziun meteorologica betg uschia favuraivla – cun «blera naiv e deplorablamain pauc sulegl» – hajan las pendicularas da Breil-Vuorz ed Andiast pudì nudar l’onn da fatschenta passà dapli frequenzas en cumparegliaziun cun l’onn passà.

Cifras cuntentaivlas per rinforzar l'avegnir da las pendicularas

L'onn da gestiun passà haja manà tar ina svieuta da 5'491'814 francs ad in cashflow da 336'116 francs e 148'581 entradas, scrivan ils responsabels en lur communicaziun a las medias. Er sche las cifras na possian anc betg cuntentar dil tuttafatg haja pudì vegnir rinforzada la bassa per in svilup persistent da las pendicularas.

Er il ressort Pradas ch’appartegna a las pendicularas ha pudì nudar 54'000 pernottaziuns uschia che la media d’occupaziun saja stada tar passa 54%.

Duas persunalias: Marcel Friberg e Pierin Vincenz

Medemamain han las pendicularas communitgà, che Marcel Friberg sa retiria sco president dal cussegl d’administraziun – quai suenter 12 onns sco president e 22 onns en il cussegl insumma. L'autra demissiun prominenta dal cussegl d'administraziun è l'anteriur schef da la banca Raiffeisen Pierin Vincenz.

Per els dus vegn proponì da tscherner en il cussegl d'administraziun als dus interprendiders Markus Noser sco president e Peter Brügger.

RR novitads 20:00