Sonda, ils 6 da zercladur 2020, han las pendicularas puspè pudì avrir las portas. Era las pendicularas da Mustér han fatg quest pass enavos en il mintgadi normal.
Bea e Markus Staubli dal chantun Turitg sa legran ch’els possian puspè ir a viandar en ils auts. Els stoppian anc ir per ils skis e chalzers si Caischavedra. Pervia dal virus na sajan las pendicularas betg pli idas e perquai hajan els stuì laschar els là.
Nus avain vis ch’i dat cresta-cot, ed jau sa legrel da tschertgar quellas.
Las pendicularas da Mustér inclusiv Sedrun/Salins – Cuolm da Vi han avert uss mintga di.
Malgrà la trid’aura hajan els vulì avrir per dar enavos insatge als giasts. Ma pervi dal virus stoppian els prender intginas mesiras sco quai che l’organisaziun da las pendicularas svizras prescriva. Perquai laschian els ir ina cabina cun maximalmain 30 persunas enstagl da 60 ch'avessan plaz la stad, di il directur da las pendicularas da Mustér Stephan Arnold.
Quai custa in zic dapli, ma il giast duai sa sentir bain tar nus.