Cumenzà cun las lavurs per l’ustaria nova sin il Cuolm da Vi han las pendicularas da Mustér ils 15 d’avust 2023. Dapi lura han ins pudì construir l’entir bajetg ed il mument vegnan fatgas las lavurs endadens. Tut en tut sajan els cuntents cun l’andament da las lavurs, di il directur Stefan Arnold. Surtut perquai ch’il plazzal da construcziun è sin sur 2’000 meters sur mar ed il material ha stuì vegnir transportà tut cun la pendiculara. Quai saja qua l’avantatg, uschia n’hajan els per quest plazzal betg duvrà sgols da helicopter, accentuescha Stefan Arnold. Tuttina dettia uss a la fin anc bleras sfidas, la pli gronda saja la coordinaziun ch’ils dretgs lavurers sajan a temp sin il plazzal e che tut il material saja er avant maun. Ma els sajan optimistics da pudair avrir il restaurant ils 21 da december 2024.
-
Bild 1 von 11. Stefan Arnold, il directur da las pendicularas da Mustér. Bildquelle: RTR.
-
Bild 2 von 11. La terrassa n'è anc betg finida, sin l'enviern vegn fatg ina provisorica schliaziun ed ils giasts pon giudair la survista. Bildquelle: RTR.
-
Bild 3 von 11. Il local da l'ustaria, il mument anc in plazzal da construcziun. Bildquelle: RTR.
-
Bild 4 von 11. La vista sin Muraun, Cazaraun, Caschleglia e glatscher da Medel. Bildquelle: RTR.
-
Bild 5 von 11. Il grond plus da l'ustaria nova è la vista sur l'entira Surselva fin a Cuira. Bildquelle: RTR.
-
Bild 6 von 11. Tut il material è vegnì transportà cun la cabina. Bildquelle: RTR.
-
Bild 7 von 11. La fatschada vegn fatga per part ord da lain dad interpresas da la regiun. Bildquelle: RTR.
-
Bild 8 von 11. Anc bler da far, tut quai vegn anc duvrà fin il december. Bildquelle: RTR.
-
Bild 9 von 11. Bildquelle: RTR.
-
Bild 10 von 11. Bildquelle: RTR.
-
Bild 11 von 11. Bildquelle: RTR.
Investiziun da 7 milliuns francs
Planisà è in restaurant che porscha plaz a 80 persunas endadens ed anc ina giada tantas sin las terrassas. Surtut la terrassa porscha ina vista grondiusa, uschia vesan ins davent dal pass Alpsu sur l’entira Surselva fin tar la citad da Cuira. Cura che la vista è buna pon ins vesair ad egl ils sgrattatschiels a Cuira vest, di Stefan Arnold. Els veglian uss era promover via lur chanals da marketing quella vista unica, accentuescha l’um dal chantun Uri. Investì vegn tut en tut 7 milliuns francs. Planisà era oriundamain ina purschida da wellness e da star sur notg en quest lieu. Quai n’ha la lescha dentant betg lubì, di Stefan Arnold. Ma el saja anc oz persvas ch’ina tala purschida avess gì in effect positiv sin l’entira Surselva. Ma las leschas na possian ins betg midar, declera il directur.
Uss veglian els persuenter porscher a las famiglias ina purschida culinarica adattada a lur basegns. Era vegnia a dar mintgadi in menu u dal chantun Tessin, Uri u Grischun. Uschia veglian els mussar ch’els sajan en la regiun dal Gottard ed era porscher insatge unic per la regiun, accentuescha Stefan Arnold. Sche tut va bain èn las lavurs finidas ils 5 da december, lura vegn tut fatg schuber ed endrizzà per pudair avrir il restaurant sin Nadal.