Las pendicularas da Val S. Pieder ston tschertgar in nov manader da fatschenta: Maurus Tomaschett bandunia las pendicularas la fin d’avrigl suenter passa sis onns a la testa sin agen giavisch. Quai ha la presidenta dal cussegl d'administraziun confermà sin dumonda da RTR. Tgi che succeda a Maurus Tomaschett u co ch'il manaschi vegn organisà suenter l'avrigl n’ha Artemis Truffer betg communitgà .
Sin l'emprim da zercladur 2019 èn vegnidas fusiunadas las Sportbahnen Vals, l'uniun turistica Visit Vals e la cumissiun da marketing da la vischnanca sut la nova Visit Vals AG. Cun questa fusiun saja vegnì per Tomaschett il punct da s'orientar professiunalmain da nov, scriva Visit Val en ina communicaziun.
Tenor las cifras para dentant la nova strategia da las pendicularas da sa cumprovar.
Traffic public enfin a Gadastatt
La gondla da Val a Gadastatt pon ins cumparegliar cun in bus da skis ch' è pendì vid ina suga. Sco il bus da skis è er il diever da la gondla gratuit. La vischnanca finanziescha quest servezzan cun ina contribuziun annuala da circa 900'000 francs.
Plus da frequenzas marcant tranter Nadal e Bumaun
Durant ils dis tranter Nadal e Bumaun han las pendicularas gì in augment da frequenzas da 17% cumpareglià cun ils ultims onns. En la gastronomia è l'augment schizunt stà tar 25%. L'augment ha dentant manà cunzunt la gastronomia als cunfins da las capacitads.
Nova strategia – nov success
Cun la nova strategia vulan las pendicularas da Val S. Pieder daventar dapli che mo in territori da skis per insiders.
RTR actualitad 12:00++
