Siglir tar il cuntegn

Header

Ina cabina da la pendiculara.
Legenda: I na va betg amunt - l’onn da gestiun 2015/16 nodan las pendicularas da Val Son Pieder ina massiva reducziun dal retgav net per 19%. RTR, Linus Livers
cuntegn

Surselva Pendicularas Val Son Pieder – retgav net crudà per 19%

L’onn da gestiun 2015/16 nodan las pendicularas da Val Son Pieder ina massiva reducziun dal retgav net per 19%. Quai en congual cun la stagiun 2014/15, «ch’era gia nauscha», scrivan las pendicularas en lur rapport da gestiun. La radunanza generala 2016 è dumengia suentermezdi.

Il retgav net è sa reducì sin 1,533 milliuns francs. Las entradas da la gastronomia na sajan betg stadas uschia nauschas sco quellas da la gestiun, scrivan las pendicularas. Quai mussia, che lur stentas sin champ gastronomic hajan gì success – numnadamain sa tractia dad ina reducziun da custs tar la cumpra da rauba e tar il persunal.

Pervi da la perdita massiva nodan las pendicularas da Val in resultat da gestiun negativ da 13’573 francs, scrivan las pendicularas da Val en il rapport da gestiun 2015/2016. La finala resulta in deficit annual da 129’933 francs.

« L’aria per respirar ans fiss i or.»

La situaziun da naiv nauscha en cumbinaziun cun las previstas economicas medemamain nauschas han sforzà las pendicularas da dumandar – sco gia l’onn avant – sustegn tar la vischnanca. Senza la contribuziun da la vischnanca na fissan las pendicularas betg pli stadas liquidas, scrivan ellas en lur rapport da gestiun: « L’aria per respirar ans fiss i or.»

Las previstas per l’avegnir paran dad ir en la medema direcziun: La situaziun finanziala restia dentant fitg tendida, resumeschan las pendicularas.

RR novitads 12:00

Dapli da Surselvaavrir la Landingpage

Nach links scrollen Nach rechts scrollen